Дагъыстан Россияны ичиндеги регионланы арасында юрт хозяйство булан машгъул болма оьзтёрече онгайлы имканлыкълары бар республика гьисапда танывлу. Шону гьисапгъа алып, артдагъы йылларда бизин республикабызда юзюмчюлюк ва бавчулукъ тармакъланы янгыдан аякъгъа тургъузма къаст этилегени англашыла.
Дагъысын айтмагъанда, бу йыл бизин республикабызны тюзлюк ва тавтюп бойдагъы районларыны топуракъларында юзюм борла оьсдюрюлеген майданланы дагъы да 2 минг гектаргъа къолайлашдырмагъа хыял этиле.
Белгили болгъаны йимик, юзюмчюлюк хайырлы тармакъ буса да, юзюм борланы тюшюм береген даражасына етишдирмек учун хыйлы харж этмеге, къыйын тёкмеге тарыкъ бола. Айтмагъа сюегеним, шону гьисапгъа алып, бизин республикабызда бир ва кёп йыллыкъ юрт хозяйство оьсюмлюклени тас этивлерден къорумакъ учун ерли шартларда сыналгъан жураларын тангламагъа тарыкъ бола.
Шолай оьсюмлюклени тас этивлерден, демек, зараллы аврувлардан ва зиянлы жанлардан сакълама тынч болажакъ ва оьсдюрюлеген продукцияны оьзюне токътайгъан багьалары учуз олтуражакъ. Бу йылны башында, дагъы да ачыкълашдырып айтгъанда, 21-нчи январда оьтгерилген ДР-ни Башчысыны янында къурулгъан экономика советни жыйыныны ортакъчыларыны арасында о гьакъда ачыкъдан эсгерилди.
Озокъда, бугюнлерде минглер булангъы гектарларда юзюм борланы яда буса оьзге оьсюмлюклени тюшюм береген даражасына етишдирмек учун онгача иш гёреген гиччи предприятиелеге рагьат тюгюл. О саялы да олагъа бирлешип байлавлукъда иш гёрме къараса, оьсдюреген продукцияны оьзюне токътайгъан багьалары-къуллукълары дагъы да учуз токътажакъ.
Совет девюрде хозяйстволаны емиш тереклер, юзюм борла оьсдюрюлеген авлакъларында, чачыв майданларында тас этивлени алдын алмакъ учун гиччи авиацияны имканлыкълары уьстюнлю кюйде пайдаландырыла эди. Тюзюн айтсакъ, гьалиги заманда шогъар арт берилегени де ичингбушдурмай болмай.
Айтмагъа сюегеним, гиччи авиация булан оьтгерилеген агротехника чараларда бирлешип зараллы жанланы ва аврувланы алдын алмакъ учун юрюлеген дарман урув ишлер оьз болжалларында оьтгерилсе, гектарланы тюшюмлюгюн дагъы да 20–30 процентлеге артдырмагъа бажарылагъанына шеклик этмеге тюшмей.
