«Дагъыстан» деген республика маълумат агентлигинде бу гезик «Ачыкъ гьакимлик» деген проектни оьлчевюнде ДР-ни юрт хозяйство ва сурсат министри Мухтарбий Ажеков булан оьтгерилген прес-конференция «Оьтген йылны гьасиллери ва бу йылгъа белгиленген борчлар» деген темагъа багъышлангъан эди. Арагъа салынгъан масъалагъа байлавлу болуп Мухтарбий Къошманбетович республикабызны маълумат къуралларыны къуллукъчуларына баянлыкъ берди.
Белгили болгъан кююнде, 2022-нчи йылгъа белгиленген борчлар ва тапшурувлар республикабызны агропромышленный комплексини аслу тармакъларында артыгъы булан яшавгъа чыгъарылгъан. Дагъы да ачыкъ этип айтсакъ, оьтген йыл бизин республикабызда 260 тон юзюм, 138 тон чалтик, бир миллион ярым тондан да кёп овощлар ва емишлер къайтарылгъан.
Оьсюмлюкчюлюкде йимик гьайванчылыкъ тармакъда да борчлар толу кюйде яшавгъа чыгъарылгъан.
– Бизге де пачалыкъны ва халкъны сурсат аманлыгъын болдурувда лайыкълы къошумун этеген юрт хозяйство къуллукъчуларына разилигибизни билдирмек, – деди эсгерген тармакъны министри, етишилген натижалагъа кюрчюленип. – Артдагъы йылларда пачалыкъны янындан овощлар оьсдюрювге де айрыча тергев бериле. Шогъар байлавлу болуп бу йылдан тутуп хас федерал программа да яшавгъа чыгъарыла. 2023-нчю йылгъа шо программагъа гёре бизин республикабызгъа кёмек гьисапда дагъы да 260 миллион манат акъча маялар гёрсетилинген.
Тюзю, къуш эт болдурувда , картоп оьсдюрювде ва йымырткъа болдурувда айлана якъдагъы къоллавчуланы талаплары толу кюйде яшавгъа чыгъарылмагъан. Шо саялы да республикабызны базарларында тышдан гелтирилген сурсат маллар да сатывгъа чыгъарыла…
2023-нчю йылгъа белгиленген борчланы гьакъында баянлыкъ бере туруп, Мухтарбий Ажеков гьалиги заманда ДР-ни юрт хозяйство ва сурсат министерлиги юрт ерлени оьсдюрювге байлавлу болуп сугъарыв ишлени камиллешдиривге ва оьзге масъалаланы ёрукълашдырывгъа байлавлу пайдаландырылагъан федерал программаланы гьакъында да айрыча эсгермей болмады.
2023-нчю йылда бизин республикабызны 40-гъа ювукъ муниципал къурулувларыны юрт хозяйство тармакъларында 100-ден де кёп инвестиция проектлер яшавгъа чыгъарыла. Инвестиция майданларда далапчы тайпаланы ва пачалыкъны янындан гёрсетилинеген харжлар пайдаландырыла. Шолайлыкъда, юрт хозяйство къуллукъчуланы талапларын гьисапгъа алып, авлакъ ниъматланы ишлетеген ва сакълавгъа салагъан предприятиелер де къурула ва пайдаландырывгъа бериле.
