А.Башировну яратывчулугъуну ва яшавуну гьакъында алимлер, профессорлар Малик Гьюсейнов, Забит Акавов, Абдулкъадыр Абдуллатипов, ДГПУ-ну дарс беривчюсю Разият Агьматова, Къызылюрт районну администрациясыны башчысы Багьавутдин Гьажаматов, ДНЦ-ны старший илму къуллукъчусу Гьасан Оразаев, Грозныйдан Мычыгъыш телевидениени къуллукъчусу, шаирни тухумундан Сайитмагьаммат Баширов, шаирни авлетини авлети, Грозныйда ихтиярланы якълав къурумланы майору Магьаммат Баширов, Мескел юртдан Шуайып Межитов, Яхсайдан муаллим Бурлият Ибрагьимова, Дагъыстанны халкъ шаири Агьмат Жачаев, милли китапхананы директоруну заместители Паша Телякъавов тюрлю маълуматланы айтып сёйледилер..
Абдулла Баширов яшавда бек масхарачы, ихтилатны кёп сюеген адам болгъан. Шо хасиятына гёре огъар «Молла Насрутдин» деп ат да такъгъанлар.Ол 1920-30-нчу йылларда къумукъ, дагъыстанлы язывчуланы арасында лап да кёп китап язгъан ва чыгъаргъанлардан бири. Къумукъ адабиятны, яшлар учунгъу адабиятны, къумукъ драматургияны оьсювюне яхшы къошум этген язывчу. Къумукъча чыкъгъан 10 китапны автору. Мычыгъыш тилде чыкъгъан 3 китапны автору. Оьтген асруну 30-нчу йыллардагъы такъсырлавларына, къыйыкъсытывларына ол да тюшген. Атасы Башир шайыхны тухумундан болгъан деп ол тутулгъан. 1931-нчи йыл ол совет гьукуматгъа къаршы агитация юрюте деп тутула. Дёрт айдан айыбы ёкъ деп чыгъарыла. 1944-нчю йыл март айда Мычыгъышны НКГБ-си ону Ватанына намарт чыкъгъан деп тута. Бир жумадан айыплы тюгюл деп чыгъара. Ону язгъанлары да къайтарылмай. Ягьы сынгъан яхсайлы шаир ва язывчу яратывчулукъ ёлгъа дагъы къайтмай. Къумукъ охувчугъа ол белгисиз кюйде къалып тургъанлыгъы да – айыплавлардан сонг ону дагъы китаплары чыкъмагъанлыкъда.
Конференцияда ону асарларыны жыйымын китап этип чыгъармакъ, Магьачкъалада бир орамгъа ва билим берив идарагъа ону атын бермек деген таклифлер болду.
Я.БИЙДУЛЛАЕВ.
СУРАТДА: конференцияны ортакъчылары.
