Артдагъы гюнлерде иш сапары булан Бабаюрт районгъа гелген Дагъыстанны Гьукуматыны ёлбашчысыны орунбасары Ш.Шариповну аслу тергевю де районда гюзлюклени болдурувгъа бакъдырылгъан эди. Ону булан бирге районгъа Дагъыстан илму-ахтарыв юрт хозяйство институтну алимлери, Агрохимцентрдан, Россельхозцентрдан вакиллер, Къызлар ва Хасавюрт районланы юрт хозяйство управлениелерини ёлбашчылары да гелген эдилер.

Бабаюрт район администрацияны залында оьтгерилген жыйындан сонг, къонакълар «Бабаюрт район» деген муниципал бирлешивню ёлбашчысы Д.Даветеев ва районну юрт хозяйство управлениесини ёлбашчысы А.Алибеков булан бирге Адил Янгыюртдагъы «Колос» деген жамиятны ишлери булан таныш болдулар. Бугюн «Колос» деген жамият – районну алдынлы хозяйстволарыны бириси. Эсгерилген хозяйствода гьайванчылыкъ тармакъдан къайры да, ашлыкъ болдурув да ёлгъа салынгъан. Бу йыл гюзлюклер мунда 220 гектаргъа чачылгъан.

– Яшырмагъа негер тарыкъ, бугюн гюзлюклени кёп гектарлагъа да чачып, ондан пайда алмагъа тынч тюгюл, – дей «Колос» деген жамиятны ёлбашчысы И.Аллаев. – Неге тюгюл де, ашлыкъ къайтарыв вакътиде Ставропольдан, Краснодардан, Рос­товдан гелген сайламлы арпа-будай ра­йонда нечакъы ала бусанг да бола. Сонг да, оьз къы­йынынг булан оьсдюрген ашлыкъ къырдан гелгенинден эсе багьа да олтура. Шо саялы да, биз гюзлюклени гектарларын оьсдюрмей, бар кююнде сакълап турабыз. Шо да аслу гьалда гьайванлагъа ем учун къоллана.

Оьзюню сёйлевюнде «Адил Янгыюрт сельсовет» деген муниципал къурулувну ёлбашчысы Мурат Къочкъаров да юртда сабанчылар учун бары да онгайлыкълар яратылгъанны эсгерди.

– Шогъар да къарамай, бугюн сабанчыланы аслам гелими къатты емлени топлав болуп токътагъан, – деди М.Къочкъаров. – Шо да туврадан-тувра, юртда йимик, савлай республикада гьайванчылыкъ тармакъны яхшы оьсювю булан байлавлу. Биченни багьасы да бар, алывчулар да аслам. Сонг да, бахча оьсюмлюклени оьсдюрегенлени санаву да йылдан-йылгъа арта.

– Бугюн Дагъыстанны Президенти Р.Абдулатипов оьзюню тергевюн юрт хозяйство тармакъгъа бакъдыргъаны негьакъ тюгюл, – деди, пикру алышдыра туруп, Дагъыстанны Гьукуматыны ёлбашчысыны орунбасары Ш.Шарипов. – Рес­публикада Президентни «Асувлу АПК» деген алдынлы проекти яшавгъа чыгъа. Шо проектге гёре районда янгы хозяйстволар ачылып да тура. Айтагъаным, Гьукуматны янындан сабанчылагъа гьар якъдан да кёмек этилежек. Биз оьзюбюзню оьзюбюз сакълап болагъан кюйде болмагъа герекбиз. Ашлыкъ буса гьаман да бары да затны башы болуп гелген.

Тюзюн айтмагъа герек, къонакълар «Колос» деген жамиятны ишлери булан рази къалдылар. Олар гюзлюклер чачылгъан тарлавлагъа да бардылар ва топуракъны ярып чыгъып гелеген гюзлюклеге яхшы багьа да бердилер.

Ёл уьстде Ш.Шарипов «Колосну» гьайван къотанына да гирди. Ол хозяйствону ишлерине багьа бере туруп, гележекде савулагъан сыйырланы санавун артдырывгъа дагъы да тергев берме герекни эсгерди.

Районда да болуп, Дагъыстанны Гьукуматыны ёлбашчысыны орунбасары Ш.Шарипов янгы йылны алдында Туршунай юртда ачылгъан «Ражаб» деген агьлю гьайван комплексге гирмей гетме болмады.

«Ражаб» – «Асувлу АПК» деген Президентни алдынлы проектини «Агьлю гьайван комплекс» деген программасына гёре къурулгъан Бабаюрт райондагъы биринчи хозяйство. Бугюн эсгерилген хозяйствода 65 жынслы гьайван сакълана. Оланы кёп яны – савулагъан сыйырлар. Эсгерилген хозяйствону ёлбашчысы А.Чимчараева билдирген кюйде, янгыз гетген йылны ичинде Магьачкъаладагъы акъкъатыкълар гьазирлейген заводгъа («Гормолзаводгъа») 120 тонгъа ювукъ сют тапшургъан.

– Бугюн биз оьзюбюзню аслу тергевюбюзню жынслы гьайванланы оьсдюрювге бакъдыргъанбыз, – дей А.Чимчараева. – Озокъда, ёкъ ерде ишни башламагъа тынч тюгюл. Биз 1993-нчю йылдан берли ишлейбиз. Артдагъы 5 йылны ичинде жынслы гьайванланы оьсдюрювге тергев бакъдыргъанбыз.

А.Чимчараеваны сёзлерине гёре жынс­лы гьайванланы сакъламакъ сабанчылар учун хыйлы пайдалы. Неге тюгюл де, жынс­лы гьайванлар береген сютню оьлчевю де аслам, майлы да дюр.

– Жынслы гьайванлар алмакъ учун, биз оьзюбюзню ерли гьайванларыбызны барын да сатдыкъ, – дей А.Чимчараева. – Озокъда, гьайванланы санаву кемиди, тек сютню оьлчевю артды. Гележекде биз гьайванланы санавун 100 башгъа етишдирмеге умутлубуз.

Оьз янындан Ш.Шарипов районну юрт хозяйствосуну гьалы булан рази къалды ва гележекде де хозяйстволагъа тарыкъ бары да кёмек этилежекни, олар Дагъыстанны Гьукуматыны янындан гьаман да якълав табажакъны билдирди.