-Фестивальны программасына гёре чебер коллективлер дёрт группагъа бёлюнюп, областны Починок, Монас­тырщина ва Ершичи деген шагьарыны, посёлогуну ва юртуну ватандашларына, Смоленск шагьарны Гнёздово деген микрорайонуну маданият къаласында оьзлени пагьмуларын гёрсетдилер. Уьч гюнню узагъында ялкъмагъа заманыбыз да болмады. Биз турагъан «Красный Бор» деген санаторийни маданият къаласында юрюлген «Уллу наслугъа тергев берив ва гьай этив» деген «дёгерек столда», «Уьчюнчю чагъындагъы адамлар булан иш гёрювню инновация къайдалары» ва «Чагъына гелген адамланы бош заманын оьтгеривде клуб идараланы ролю» деген темалагъа гёре пикру алышдырывда, «Бары да затгъа уста къоллар» деген суратлав ва безендирив-сынав агьамиятлыгъы булангъы саниятны асарларыны выставкасын ачывда, «Мени йылларым – мени байлы­гъым» деген маданият чарада, «Смоленск къурдашланы жыя» деген ял алыв ахшамда, «Сувукъмурза» деген Янгы йылгъа багъышлангъан гёрсетивде ва ретро-дискотекада ортакъчылыкъ этилди. Менден къайры да фестивальда «Сулевкентни керамикасы» деген яшёрюмлени чебер школасы ва Ичичалидеги «Къалайчы» деген школаны вакиллери де бар эди.

Фестиваль гала-концерт булан тамамланды. Уллу йыр байрамгъа гелген чебер коллективлеге эсделик савгъатлар тапшурулду, магъа буса фестивальны диплому берилди.

Янгы йылны алдында Хасавюрт районну башчысы Жамболат Салавовгъа Смоленск областны губернаторуну орунбасары Н.М. Кузнецовдан баракалла кагъыз гелди.

«Гьюрметли Жамболат Шапиевич!

Уллу чагъындагъы адамлагъа тергевлю янашагъаныгъыз ва оланы масъалаларын чечивде этеген ишигиз учун Смоленск областны администрациясы сизге баракалла билдире. Сиз башчылыкъ этеген районну вакиллери бизде оьтгерилген фестивальда ортакъчылыкъ этмек де сиз уллу чагъындагъыланы яратывчулугъуна оьр даражада тергев берегенлик бола. Гьар ишигизде де уьстюнлюклер ёрайман!» – деп язылгъан шо кагъызда.



Гебек КЪОНАКЪБИЕВ,

оьз мухбирибиз.

Суратда: Дагъыстанны ат къазангъан артисти

Латип Шайыпов Бедрос Киркоров булан.