Яшавда оьзлерден уьлгю алма ярайгъан, ­ оланы яшав турушуна сукъланагъан агьлюлер бола. Шолай агьлюлерден Хасавюртда яшайгъан Басхановланы агьлюсюн де эсгерме тийишли.

Ожакъны орта багъанасы Набийбулла сав яшавун къурулушларда загьмат тёгюп оьтгерген. Ону агьлюсю Райиса Магьачкъаладагъы педагогика институтну геог-рафия факультетин битдирген сонг шагьардагъы шко-лаларда узакъ йыллар дарс берип тургъан.

Яшавлукъ масъалалагъа гёре оланы агьлюсю 1999-нчу йылда Аштархан шагьаргъа гёчме борчлу бола. Татывлукъда яшайгъан агьлюде бир къыз, эки улан оьсе, тарбиялана. Райиса къызы Сабинаны гьакъында булай дей:

– Гиччи заманындан берли ол бир тамаша гьаракатчы къыз эди. Оьзюне уьч йыл болагъанда охума, язма уьйренди. Алты йыл тамамлангъанда биз ону Аштархандагъы лицейге охума салдыкъ. Шо лицейде аслу тергев физика, химия, математика предметлеге бериле эди,– дей ол, къызын оьте макътама да сюймей..

2016-нчы йылда Сабина лицейни эки алтын медаль алып битдире. Бирин­чиси – оьр къыйматлар булан охугъаны ва экзаменлерде 100 бал алгъаны учун. Экинчи медальгъа буса «Аштархан областны оьктемлиги» деп язылгъан. Шо йыл Сабина Москвада Сеченевни атындагъы университетни фар­мацевт факультетине енгил кюйде охума тюше. Ол мунда охуй туруп, илму лабораторияларда билимлерин артдыра. Телевидениеде «Что? Где? Когда?» деген оюнларда ортакъчылыкъ эте. Охуп битген ол Италияда Вероны деген шагьарда халкъара аспирантурагъа тюше.

Охуп битген Сабина гьар тюрлю халкъара илму журналларда оьзюню макъалаларын чыгъара, конференцияларда, форумларда ортакъчылыкъ эте, алдынлы ерни ва уллу оьлчевде акъча савгъатны ала.

Бугюнлерде де ол Вероны шагьарны университетинде илму ахтарывлар юрюте. Терапияда, метаболомикада янгы дарманланы чыгъарма къасткъыла. Билимли, гьа­къыллы, англавлу, сюйкюмлю къызыбыз Сабина янгыз Хасавюртну тюгюл, савлай Дагъыстаныбызны оьктемлиги деп айтма сюемен.