Россияны Президенти ватандашланы газ булан таъмин этмеге деп берилген тапшурувлар нечик кютюле ва шолар, гертиден де, кютюлеми? Гелигиз, шоланы тергеп къарайыкъ.
Оьтген йылны 21-нчи август айындан берлиги тапшурувну айланасында нечесе соравлар тувулуна.
Газ быргъыны абзарны дазусуна етишдиргенге биревге де акъча тёлеме тарыкъ тюгюл. Тек газны шо дазудан уьйге тартмакъ учун харж чыгъарма герек. Демек, дазудан уьйге ерли газ быргъыланы тартмакъ, газ котел салмакъ, ону ерлешдирмек учун акъча берме тюшежек.
Бирдагъы янын айтсакъ, яшаву осал агьлюлеге кёмек къол узатылажакъ ва енгилликлер этилежек. Дагъыстанны энергетика министерлиги билдиреген кюйде, Дагъыстанны Гьукуматында шо масъалагъа къаралып тура. Шону загьматны ва яшавлукъ оьсювню министерлигини къуллукъчулары да гертилей. Олар берилген арзалагъа гёре, шолай ожакъланы айланып чыкъгъан. Енгилликлер болдурулажакъ агьлюлени санаву токъташдырылгъан. Шолагъа Уллу Ватан давну ортакъчылары ва оланы артындан къалгъан къатынлары, тылны загьматчылары, сакъатлар, сакъат яшлары булангъы агьлюлер, янгыз яшайгъан пенсионерлер де къошулгъан. Шолай агьлюлени санаву 1098 болгъан.
Яшаву осал агьлюлеге 60-200 минг манат берилмеклик бар. Шо харжгъа да олар бары да тарыкъ-герекни алып болажакълар.
Мунда бирдагъы бир янын айтма сюебиз: газ булан таъмин этив газ тартылгъан юртларда юрюлежек. Бирдагъы яны да – газ тартыв далапчылыкъ юрютегенлеге этилмежек.
Газ тартмакъ учунгъу арзаланы гьар райондагъы шо ишлени юрютеген идаралар къабул этме герек. Шолай да, арзаланы республикадагъы 43 де МФЦ-лерде къабул этежек. Адамлар англасын учун айтабыз, шо ишлени юрютмек учун ожакъны бары да тарыкълы ва кадастр якъдан гьисапгъа алынгъан документлери болма да герек.
Документлери ёкълар шоланы тезликде этме герек. Дагъыстанны Росреестр управлениеси билдиреген кюйде, Россияда «дачная амнистия» дагъы да 5 йылгъа узатылгъан.
Кадастр гьисапгъа алыв гьали енгиллешген. Шогъар дазу аралыкъланы белгилев ва уьйню техника планы гире. Гьар адамгъа пачалыкъ реестрге уьйлерин гийирмек учун шону гьисапгъа салма герек, шону да шо къуллукъну инженерлери кюте. Гьар агьлю инженерлер булан дыгъар эте ва олар шо ишлени толу кюйде кюте. Озокъда, шо къуллукъчулагъа да этген иши учун гьакъ берме герек.
«Артда токъташдырылгъан кюйде, Президентни тапшурувуна гёре адамланы газ булан таъмин этивню масъаласын яшавгъа чыгъармакъ учун янгыдан тергевлер болдурдукъ. Эгер де шо санав башлап 79686 буса, гьалиге 2895-ге тюшген», – деди артдагъы оьзюню прес-конференциясында «Газпром межрегионгаз Магьачкала» деген бирлешивню баш директоруну ойчусу Ризван Къазимагьамматов.
Олар берген маълуматлагъа гёре, февраль айны 10-на 800 арза берилген, тергевлерден сонг 657 къалгъан.
Эсгерилген тапшурувланы кютмек учун янгыз быргъылар тартгъан булан болмай, шо газны яягъан станцияланы гючлендирме тюше. Шолай станциялар Дагъыстанда 25 бар.
2021–2025-нчи йыллагъа газ булан таъмин этив программагъа гёре 41083 уьйге газ тартма тюшежек, 914 чакъырымгъа газ быргъылар тартылажакъ ва 265 котельныйлар янгыртылажакъ.
Арадан кёп де гетмей, Дагъыстандагъы бары да агьлюлер газ булан таъмин этилежек. Шондан сонг адамлагъа янгыз якъгъан газына гьакъ тёлемек къалажакъ.
Гьазирлеген
Къ. КЪОНАКЪБИЕВ.
