Йыл сайын интернет басгъын этсе де, печат къуралланы агьамияты кем болмай. Районланы, шагьарланы, савлай алгъанда республиканы гьар гюнлюк, жумалыкъ ва айлыкъ тарихи чыгъагъан газетлерде ва журналларда сакълана.
Къарабудагъгент район газетни биринчи номери печатдан 1951-нчи йыл 7-нчи ноябрде чыкъгъан ва редактору этилип Буйнакск районну Тёбен Жюнгютей юртундан чыкъгъан Хизри Гьажиев белгиленген.
Шо вакътини ичинде газетни 6730 номери чыкъгъан, 7 редактор, 50-ден де артыкъ мухбирлер, жаваплы къуллукъчулар, печат этегенлер ва газетни чыгъарагъанлар ишлеген. Газетни ёлу гьар заманда да тегиш болмагъан, тек оьтген заманны ичинде халкъына пайдалы болуп, районну яшавун суратлап тургъан. Олар бугюнлерде де шо ишин давам этелер, янгы технологияланы имканлыкъларындан пайдаланып, заманны талапларына жавап бере ва оьзлени уьстюне салынгъан борчланы кютелер.
– «Районну яшаву» деген газетибиз — районубузну халкъыны яшавуну гюзгюсю, дагъы да теренден айтгъанда, оьтген заманны тарихи, архиви болуп токътай. Ойлашып къараса, районну гьар гюнлюк дегенлей яшаву дагъы башгъа не ерде сакълана? — дей газетни баш редактору Асадулла Гьайбуллаевич Гьажиев(суратда).
Демек, район газет гьар заман жамият булан бирге оьсген, бирге яшагъан.
– Алда газет партияны маълумат берив аслу къуралы болгъан ва «Коммунизм ярыгъы» деген ат булан чыкъгъан. Менден алда ишлеген редакторлар ва редакцияны коллективи, печатны алдына пачалыкъ, районну ёлбашчылары салагъан масъалаланы чечивде, районну жамият-политика, экономика ва культура яшавун суратлавда районну партия къурумуну инамлы кёмекчиси болуп гелген, – деп давам эте Асадулла Гьажиев. — Алдынлыланы арагъа чыгъарывгъа, кемчиликлени танкъыт этивге газетде аслам ер берилген. Журналистлер гьар заманда да оьзлени ихтиярларын ва борчларын билип ишлеген. Газетни гьар номерин янгы-янгы маълуматлар булан толумлашдырма, гьар материалны маъналы этип къурма ва шоланы халкъ англайгъан кюйде язма кёп усталыкъ ва гьюнер тарыкъ. Тек артдагъы вакътиде касбучулар етишмейгени ишни къыйын эте.
Мен бу газетде бирдагъы бир яхшы затны эследим: оьмюрюн журналистикагъа, газет чыгъарывгъа багъышлагъан ва загьмат абатларын шунда башлагъан адамларын олар унутмайлар. «Ёлдаш» газетни къуллукъчусу Абдулвагьап Межитов, Дагъыстан радиону къуллукъчула-ры Абдуллабек Абдуллабеков, Солтанбек Солтанбеков, Къурбанали Шамсутдинов, Дагъыстан китап издательствону редактору болгъан белгили шаир Бадрутдин Магьамматов, шаир ва язывчу Латип Гьажакъаев, шаир Узлипат Ибрагьимова, «Къарчыгъа» журналны редактору Насрулла Байболатов биринчи абатларын мунда алма башлагъан. Оланы суратлары тёр тамны бийлеген. Шо гьалиги замандан олагъа берилеген разилик деп эсиме гелди.
Бугюнлерде бу газетни тиражы республикадагъы къумукъ район газетлени инг де кёбюнден гьисаплана ва 3 минглеге етише.
«Районну яшаву» деген газет – муниципал къурулувну печат къуралы. Шонда район администрацияны ва ону бёлюклерини иши гьакъда языла, къарарлары чыгъа.
Газетни бетлеринде гьар тюрлю федерал, республика ерли прог-раммалар булан районну муниципал къурулувларыны тармакъларында этилген, этилип турагъан ишлеге айрыча ер бериле.
Ондан къайры да, «Къоччакълыкъ» деген рубриканы тюбюнде уьлкени Савутлу Гючлери Украинада фашизмни, миллетчиликни алдын алмакъ учун юрютеген дазулангъан хас чарада бизин райондан барып ортакъчылыкъ этеген игит уланланы гьакъында материаллар печат этиле. Имканлыкълар болса оланы редакциягъа чакъырып ёлугъувлар, лакъырлашывлар оьтгериле. Шолай ёлугъувлар къоччакъ уланланы ругьун гётере, гёнгюн ача. Оьсюп гелеген яш наслуну патриот ругьда тарбиялавгъа болушлукъ эте.
Газет тил масъалалагъа гёре де кёп иш эте. Муаллимлени, алимлени ва охувчуланы жыйып кёп санавдагъы «дёгерек столлар» оьтгерилген. Бу ерде ана тилде чыгъагъан газетни маънасы арта, неге тюгюл де газет халкъны арасында ана тилни сакълайгъан къурал болуп токътай. Миллетни арасындагъы адатлангъан тарбия азып бара, газетни бетлеринде шону гьакъында пикру алышдырма бола. Демек, газет адамланы къайсы масъаласын чечмек учун да ачыкъ майданча болуп токътай ва шогъар имканлыкълар болдурула.
Озокъда, бу ерде газетни охувчуларыны якълаву газетге бек тарыкъны да айтма герекбиз. Почтадан таба язылыв багьа болгъанда тиражлар кемий, тек «Районну яшаву» деген газет охувчуланы пайдасына, оланы тарыгъына табулуп ишлеп туражакъ. Шону кютмек учун тарыкъ чакъы сынав да, бажарывлукъ да, имканлыкъ да бар.
Г. БЕК.
