Гьар адамгъа ва ону яшавдагъы ишлерине гёре къыймат беребиз: «яхшы адам» ва «яман адам» деп айтабыз. Яхшы болмагъа къыйын, яман атны къазанмагъа нечакъы да тынч. Адамланы кёплери яхшы болмагъа, яшларына, яшларыны яшларына да тизив тарбия бермеге, яхшы къылыкълагъа уьйретмеге уруна. Тек булай гьаракат тарыкълы гьасиллеге гьар заманда да етишдирмей.
Тарбиялав авур иш десек, янгылыш болмасбыз. Аслу гьалда бу ишге ата-аналар, школаны муаллимлери уллу къошумун эте. Артдагъы йылларда, мен ойлайгъан кюйде, школаларда шо тарыкълы ишге агьамият аз бериле. Ата-аналаны кёплери гьар гюнлюк ишлери булан машгъул бола туруп, яшланы тарбиялав шоланы тувра борчу экенин унуталар.
Шогъар да къарамай, авлетлерине тийишли тарбия береген агьлюлер ёкъ тюгюл. Башлыгентли (Къаягент район) Абдулхаликъ ва Бурлият Гьамитовланы агьлюсю шолайлардан санала. Бу агьлюде дёрт яш тувгъан, тарбиялангъан, юртлуларына ва айланасындагъылагъа пайдалы адамлар болуп оьсген. Мен яшланы гиччиси Марат Гьамитовну гьакъында хабарламагъа сюемен.
Маратны гиччиден берли таныйман. 2017-2021-нчи йылларда ол юртдагъы орта школада охуй туруп, спортну тутушуп ябушув ва ушу-саньда журалары булан машгъул бола эди. Спортну дюньясына ол 8 йыллыкъ чагъында гирген ва орта школаны охуп битдиргинчеге спорт булан жагь кюйде машгъул болгъан, гьар тюрлю район, республика ярышларында ортакъчылыкъ этген. Шону бизин алдыбызгъа салынгъан 50-ге ювукъ медаллар, грамоталар исбатлай. Марат ес болгъан кубоклар да айрыча ерни тутгъан.
2021-нчи йылда Марат Гьамитов Башлыгент юртдагъы орта школаны уьстюнлю кюйде охуп битдире ва шо йыл Курск шагьардагъы пачалыкъ медицина университетни стоматология факультетине охумагъа тюше. Бугюн Марат университетни 3-нчю курсунда охуй. Оьтген йылланы ичинде ол охуй туруп, спорт булангъы аралыкъларын да бир де бёлмеген. Ол башлап университетни, сонг Курск областны тутушуп ябушувдан, ушу саньдадан ва спортну оьзге жураларындан чемпиону болмагъа бажарды.
2023-нчю йыл Марат Гьамитовну спорт яшавунда айрыча ер тутгъан деп айтмагъа болабыз. Яш чагъына да къарамай, Марат бу йыл спортну янгы журасы грепплингде Россияны чемпиону деген оьр атгъа гётерилмеге ёл тапды.
Гьали ону яшавуна гирген бирдагъы бир унутулмас агьвалат болду. Шо да адамны яшавун къутгъарыв булан байлавлу. Бу иш август айны 29-нда Магьачкъалада болгъан. Марат Гьамитов шо гюн оьзю охуйгъан Курск шагьардагъы пачалыкъ университетге бармагъа ёл чыгъа. Транспорт масаланы тюз чечип, Марат атасы Абдулхаликъ ва анасы Бурлият булан чыгъагъан узакъ ёлну алдында ашамлыкъ продукталар алмагъа автостанцияны ягъасында ерлешген «Цумада» деген базаргъа тербене. Базаргъа гиргени булан ата-ана ва Марат авур гьалгъа тюшген адамгъа къаршы болалар. Орта оьмюрден оьтген шо адам Мурат Халимбеков болуп чыгъа. Марат биринчилей аврувну айланасына жыйылгъанланы арасына гирип, аврувгъа къарамагъа башлай. Ону гьалына тюз къыймат бере ва еринде биринчи кёмегин гёрсете. Ол башлап аврувну къабургъасына бура, сонг ону авзун ачмагъа уруна. Маратны тюз юрютген ишлери Муратны айыкъдыра, огъар тыныш алмагъа ёл ача. Сонг, «скорый» чакъырыла. Гелген врачлар аврувгъа биринчи кёмек заманында ва тюз этилгенине бек тамашалыкъ этелер ва шону натижасында аврув сав къалгъанын исбатлайлар. О вакъти Марат ва ону ата-анасы охувгъа ва уьйге къайтывну ёлунда табылалар.
Арадан аз заман гетип, Халимбековлар Муратны къутгъаргъанланы агьлюсюн табалар, олар булан аралыкъ туталар. Игит ва рагьмулу улангъа баракалла этелер, ону сыйлы атын бары да дагъыстанлылар билгенни сюегенин айталар.
Бугюн Марат Гьамитов йыракъ Курск шагьардагъы пачалыкъ медицина университетде охувун уьстюнлю давам эте. Юртлулары, ерли школаны муаллимлери, ата-анасы билимлеге ес болувда, тарбиялавда этген гьаракатын оьр даражада юрюте. Спорт булан машгъул болагъанын да унутмай. Охувун ва спортдагъы оьр натижаларын бажарывлу юрютеген 19 йыллыкъ Маратгъа генг яшавда янгы уьстюнлюклер ёрайбыз ва шагьра ёл сагъа Марат деп айтабыз.
Магьамматрасул ИБРАГЬИМОВ.
