Бир арада сагьнаны уьстюн школа къалипли опуракълар гийген яш-юшдан толуп къалды. Олар «Переменка» (танапус) деген гиччи спектакль гёрсете экенлер. Ойнайлар, чабалар, гюп-гюп болуп хабарлайлар. Олардан сонг школада охуйгъан къызланы бир гюбю «Къумукъ къызланы бийивюн» арив гёрсетди.
Артда школаны директору Магьамматзапир Бамматов гиришив сёз айтды.
– Бизге хошгелдигиз, азиз къонакълар ва юртлуларым! 110 йыл аз оьмюр тюгюл. Бизин школа – оьмюр ягъындан алгъанда – уллу «тамаза». Дагъыстанда янгы къайдалы (свет) школаны лап башлап гёрмекли ярыкъландырывчу ва дин алими Абусупиян Акаев ачгъан. 1903-нчю йыл бизин Уллу Къазанышда Темиркъазыкъ Кавказда биринчи болуп булай школа ачылгъан.
Школагъа эки класгъа болур чакъы ери булан янгы бина 1912-нчи йыл къурулгъан. Ону къурдургъан пача асгерни полковниги – Гьажи Алхасов. Исабек Абдуллаев деген юртлубуз шонда биринчи муаллим болуп ишлеген… 1928-нчи йыл башлапгъы школа етти йыллыкъгъа айлангъан. 1932-нчи йыл толу тюгюл орта школагъа кюрчю салынгъан. Шоллукъда, билим берив оьсе башлагъан, школа янгыртыла гелген… – деп, ол школаны аякъгъа турув девюрлерин, онда ишлеген хыйлы муаллимлени атларын уллу гьюрмет булан эсгерип алды. Давдан сонггъу йылларда Совет Союзуну бары да буччакъларындан гелген 76 муаллим де болгъанны малим этди. Кёп адамны атларын эсгерди. Школадан чыкъгъанлардан кёп адам уллу гьакимлер, алимлер, шаирлер, усталар… болгъанны англатды.
– Тюзю, школабыз кёп йыллар бою ярышдырыв ишлерсиз къалып, «къавжап» къала тура эди. Районгъа гьаким болуп Даниял Шихсайитов гелгенден берли, школалагъа къарав, къуллукълар этив кёп къолайлашды. Шону яхшылыгъындан школабыз, ичи булан тышы онгарылып, къурчакъдай болду.
Охутувну гьалиги замангъы къураллары да берилме башлады. Бизге арив гёз къаратып янашагъаны саялы районну гьакимиятына баракалла айтмакъны тийишли гёремен, – деди ол.
Шатлыкъланы бютюн барышын суратлама тюшсе, газетни бары да бетлери толуп къалмакъ да бар. Шону учун да шо гюн болгъан агьвалатланы умуми кюйде, къысгъача этип суратлап оьтме тюшер.
Хыйлы яшлар сагьнагъа чыгъып шиърулар да охуду, йырлар да айтды. Дагъы да кёплер чыгъып сёйледилер. Сёйлевлер булан аралашып, районну «Темирхан-Шура» деген ансамбли къумукъ ва оьзге милли бийивлени чартлатып бийиди.
Школаны 1-нчи охуп битдирген отставкадагъы полковник Ильяс Къазиханов оьзю башдан оьтгерген гюнлени, башлапгъы муаллимлерин кёп сагъынып дегенлей эсге алып, къумукъча бек арив сёйледи. Сагьнада Халимбекавулдагъы «Гёбелек» деген садикни уьстюне милли опуракълар гийген гиччипавлары, къумукъча бийип, къарагъанланы тазза къурчун къандырды.
Къумукъ театрны артистлери Т. Осаева ва Н. Акавов «Эркеч Али» деген спектаклден гесеклени гёрсетип, жыйылгъанланы кюлетди.
РФ-ни маданиятыны ат къазангъан къуллукъчусу, белгили жамият чалышывчу Разия Исаевна Жамболатова оьзюню сёйлевюнде, школаны, билим беривню кёп уллу агьамиятын мисаллар булан исбатлап, Къазаныш уллу юрт, уллу жамият экенни, ону да, Бугленни де тарихи аралыкъларын, татывлугъун эсгерди. Юртланы бир-бири булан къатнавларын дагъы да яхшылашдырмакъны энни уллу агьамияты бар экенни айтды. Школагъа оьзю язгъан китапланы савгъат этди.
Юртну башчысы М. Къазакъов да школаны юбилейи булан къутлады. Къазанышны гьайын этегени саялы Хизри Исаевич Шихсайитовгъа жамиятны атындан баракалла билдирди ва огъар Къазанышны «Гьюрметли ватандашы» деген шагьатнама берилегенни билдирди.
Буйнакск район администрацияны башчысыны заместители Гь.Ражбудинов, академик А. Бучаев, «Колокольчик» деген журналыны редактору, Москва шагьарны культурагъа къарайгъан комиссиясыны члени Б. Ханмурзаева, А. Эрболатов, белгили шаир В. Атаев, техника илмуланы доктору Ш. Магьамматов, билим беривню къуллукъчуларыны профсоюзуну район комитетини председатели С. Абакаров ва оьзге ёлдашлар чыгъып сёйледилер. Шо гюн школагъа савгъатлар да тюшдю.
Абдулла ЗАЛИМХАНОВ.
Суратда: байрамдан мюгьлет.
