Асгер къуллукъда сыналгъан

 

 

Тамазатёбели улан Рамазан Гьажиев Украина бойда юрюлеген хас асгер гьаракатда биринчи гюнлеринден башлап ортакъчылыкъ эте. Бугюнлерде ол оьзюне берилген отпуска болжалындан пайдаланып, ата юртуна гелип, лап да ювукъ ва аявлу адамлары булан ёлукъгъан. Мен де Рамазан гелгенни билип, ону булан лакъыр этдим.

 

–  Мен яшавумну Россия армия булан байлагъа­ныма бир мюгьлетге де  гьёкюнмегенмен. Гьар адам яшавда оьзюню юреги авагъан касбуну танг­лай. Эгер де биз оьзюбюзню сююмлю Ватаныбызны, пачалыгъыбызны, ювукъ ва азиз адамларыбызны парахатлыгъын ва аманлыгъын къоруп сакъламасакъ, биз саялы оьзгелер бу сыйлы къуллукъну кютежекми?! Мен якъламасам тувуп оьсген элимни, ятлар гелип якъламажакъ деп санайман. Биз тюзлюкню, адилликни, гертиликни ва парахат яшавну яныбыз. Биз уьстюнлюкню алажакъгъа мен бир гюн де шекленмегенмен,– дей ташдырып Рамазан.

Жагьил чагъына да къарамайлы, Рамазан асгер къуллукъда сыналгъан.  Ол оьзюню алдына салынгъан борчлагъа ва тапшурувлагъа тындырыкълы ва мекенли кюйде янаша. Буссагьатгъы вакътиде тувулунгъан къыйын ва четим шартларда шолай жаваплы янашыв гьар асгерчиден талап этилегенин 23 йыллыкъ Рамазан яхшы англай.

Гиччиден  Рамазан ни­з­амлы, ата-анасына бавурлу, уллулагъа гьюрмет этип, гиччилеге гьайлы янашып оьсген улан. Юртдагъы мактапда 9 класны битдирип, 2015-нчи йылда Свердлов областны Сухой Лог деген ша-гьарындагъы медицина училищеге  охума тюше. Орта  хас касбу билим береген охув ожакъны битдирип, ол уьлкебизни тахшагъары Москвагъа ишлемеге чыгъып гете. Амма шонда ол узакъ заман ишлемеген.  2019-нчу йылда Рамазан Россия армияны сыдраларына чакъырыла. Асгер къуллугъун жагьил улан йыракъ Приморск крайны Уссурийск шагьарында кюте. Асгерден айрылма сюймей, шо йыл дыгъар байлап, Ватанны герти ва инамлы  якълавчусуну касбусун танглай. Гележек къысматын асгер къуллукъ булан тыгъыс кюйде байлай.

2022-нчи йылны февраль айында Украина бойларда хас асгер гьаракат башлангъандан берли, биринчилерден болуп шонда жанлы кюйде ортакъчылыкъ эте. Запорожск бойда украинли миллетчилеге къаршы турувларда оьзюн  къоркъув билмейген, Ватанны инамлы патриоту гьисапда гёрсетмеге болгъан. Бу бойдагъы халкъны душманны чапгъынларындан сакълай. Украинли асгерлер булангъы савутлу къаршы турувларда къыйын ва четим тапшурувланы къоркъув билмейли кюте.

Ол хас асгер гьаракатны ортакъчысы гьисапда санитар инструкторну борчларын кюте, урушларда яра тийген ёлдашларын къоркъунчлукъ ёкъ ерге етишдирип, хыйлы гезиклерде олагъа оьзюню къолундан гелеген биринчи медицина кёмегин этген.

Заманында тийишли болагъан медицина чаралар гёрюлсе,  солдатланы яраларын тез бакъмагъа ва енгиллешдирмеге бола­гъанны гьар медицина къуллукъчу йимик, ол да яхшы англай. Шолайлыкъда, Рамазан  оланы ажжалдан къутгъаргъан десек ялгъан болмас.

Ватанын къоччакъ кюйде якълайгъан улан Рамазан Гьажиев лайыкълы савгъатлагъа да ес болгъан. Ол хас асгер гьаракатда гёрсетген игитлиги ва къоччакълыгъы учун “За воинскую доблесть” ва  “За боевые отличия” деген медаллагъа лайыкълы болгъан.  Отпускадан къайтгъан сонг ону тёшюн бирдагъы савгъат безежек. Айтагъаным, Рамазан Гьажиев  “Къоччакълыгъы учун” деген медаль булан савгъатлангъан деген буйрукъ да чыкъгъан.

Рамазанны савгъатлары булан юртлулары да оьк­тем бола. Ону оьсдюрген ва тюз ёлларда тарбиялагъан атасы Абзакъайгъа ва анасы Заремагъа баракалла ва разилик билдирип, оланы атына алгъышлар ва макътав сёзлер айта.

Халкъын, элин оьр этеген уланлагъа минг макътав деп эл арада кёп айтыла.  Рамазан йимик уланларыбызны атына макътавлар минг керен айтсакъ да  кёплюк этмежек.

Биз де сююмлю Ватаныны къоччагъы Рамазан Гьажиевге къыйынлы ва агьамиятлы асгер гьаракатында уьстюнлюклер ёрайбыз.

 

Бэлла ГЬАЖИГЕЛДИЕВА,

Россия Федерацияны журналистлерини союзуну члени.

 

СУРАТДА: Р. Гьажиев.

 

Авторизация
*
*
Регистрация
*
*
*
Согласны с условиями сайта?
Генерация пароля