Артдагъы эки йылны ичинде онгайлы табии газгъа харлылар учун гёрюлеген къошум чараланы, енгилликлени натижасында Дагъыс­танда 3 мингге ювукъ яшаву осал, айрыча адамлагъа ва яшавлукъ объектлеге пачалыкъны янындан тегин кёмек этилген. Программа Россияны Президенти Владимир Путинни сиптечилиги булан башлангъан ва гьали де узатылып тура.

Агьамиятлы милли борчну оьлчевюндеги программаны давам этиливюне байлавлу болуп Магьачкъала-Межрегионгаз деген компанияны башчысы Александр Давыдов бугюнлерде, республикабызны маълумат къуралларыны къуллукъчуларына берген баяны булан «Ёлдашны» охувчуларын да таныш этебиз.

 – Александр Владимирович, гертиден де, бизин зор уьлкебизде яшавлукъ-коммунал къуллукъларындан бир адам да, къурум да магьрюм къалмагъа тюшмей. Тек не этерсен, гьакъыкъатда бизин регионда яшайгъан бир тайпа ватандашлар ва яшавлукъ объектлер ­онгайлы къуллукълагъа къошулмай ягъада къалагъаны белгили. Оланы талапларын, гьажатлы къуллукъларын гьисапгъа алып гележекде не этмеге хыял бар?

 – Яшавлукъ шартлары къы­йынлы гьалдагъы ватандашланы талап­лары гьалиги заманда Россияны Гьукуматыны янындан тергевсюз къалмагъан. РФ-ни Президенти Владимир Путинни тапшурувуна гёре онгайлы табии ягъарлыкъгъа къошулма имканлыгъы ёкъ уьй есилерине йимик, гележекде яшавлукъ агьамияты булангъы объектлеге де кёмек этилинежек. Газ тартылгъан муниципал къурулувларында быргъылагъа тегин кюйде къошулмакъ учун къоллавчулагъа 100 минг манатны оьлчевюнде харж гёрсетилине. Гьали-гьалилерде Россияны Гьукуматында гьазирленген программагъа савлукъ сакълав ва билим берив идаралар да къошулажакъ, демек, больницалар, школалар, ясли бавлар, акушер пунктлар ва оьзгелери. Шолар да программагъа гийирилди. Дагъыстанда эсгерилген программаны оьлчевюнде ватандашланы уьйлерине табии газ ягъарлыкъ тартылгъаны гьакъда да разилик булан эсгерме тюше.

 – Гьали-гьалилерде Дагъыстанны- Башчысы Сергей Меликов Моск­вада болувунда «Газпром-межрегионгаз» деген компанияны гюп­лерини генеральный директору Сергей Густов булан ёлукъду. Ёлугъувда не йимик масъалалар арагъа чыкъды?

 – Ёлугъувну вакътисинде къоллавчуланы табии ягъарлыкъ газ булан таъмин этивню программасыны ва шолай да имканлыкълары осал къоллавчулагъа ягъарлыкъгъа къошулсун учун этилеген кёмеклешивню гьакъында сёз болду. Шо программа башлап 2021-2025-нчи йыллагъа ерли белгиленген эди. Уьстде де эсгерилгени йимик, кёмеклешив гьали даимлик болжалгъа узатылажакъ. Сергей Меликов буссагьатгъы вакътиде Дагъыстандагъы къоллавчуланы субсидиялардан пайдаланагъан ортакъчыларыны сыдралары толумлашдырылагъаны гьакъда да эсгерди. Шонда Украинада юрюлеген дав гьаракатдагъылар да гире.
Сергей Густов аянлашдыргъаны йимик, Дагъыстанда гьалиги заманда ерли талапланы гьисапгъа алып, газ линияланы къурув ва тийишли къуралланы ясандырыв ишлер юрюлюп тура. Алда токътагъан масъалалар кёп. Дагъысын айтмагъанда, бизин республикабызда яшайгъан ватандашланы 30 процентине онгайлы табии газ ягъа­рлыкъдан пайдаланмагъа имканлыкълар болдурулмай тура.

 – Газ булан таъмин этивге байлавлу ишлер юрюлегени англашыла, шо къошум программада буссагьатгъы вакътиде нече муниципал къурулувлары ортакъчылыкъ эте?

 –Он район ва беш шагьар муниципал къурулувлары. Шоларда буса юзлер булангъы ерли муниципал къурулувлары да ортакъчылыкъ эте. Хунзах ва Гюнбет район­ларда 2021-2022-нчи йылларда 4 юртгъа газ быргъылар тартылгъан. Гьайдакъ районда да ватандашланы уьйлерине йимик, яшавлукъ объектлеге де онгайлы табии газ ягъарлыкъны гийиривге байлавлу ишлер давам этилине. Шо ишде бизге ва ерли муниципал къурулувларына ДР-ни энергетика мини­стерлигини янындан кёмек болдурулагъаны гьакъда да айрыча эсгермеге тюше.

 – Эсгерилген къошум программагъа гирмек учун муштарлыланы арзалары толу кюйде къабул этилинеми?

 – Толу кюйде кагъызларын онгар­май туруп, арзалар къабул этилинмей, гери урула. Бизин ишибизде шолай гезиклер де аз болмай. О саялы, уьстде эсгерилгени йимик, тийишлилени арзаларын къабул этив ерли муниципал къурулувлары булан байлавлукъда юрюле.