Тюзюн айтгъанда, табиатда ва жамиятны ичинде тазалыкъ болмаса, савлукъ болмай. Савлукъ болмаса, адам болмай, адам болмаса, миллет болмай. Миллет болмаса пачалыкъ да болмайгъаны гьакъ герти.
Бизин пачалыгъыбыз бир жамиятдан башгъасына гёчеген девюрде, базар аралыкълар оьмюр сюреген заманда, пакарсызлыкъдан пайдаланып, къолгъа таза тюгюл тайпалар талавургъа, мал-матагь жыймагъа белсенип, загьматчы халкъ хыйлы йылланы боюнда топлагъан байлыкъларындан магьрюм къалды…
Демократлар гётерген эркинликни, онгачалыкъны байрагъыны тюбюнде белгиленген айрыча есликни чакъырывлары нечакъы къычыра, гёзге тюртюле тура буса да, тек бугюнге ерли, савлай уьлкеде йимик, бизин республикабызда да орта мадары булангъы класны амалгъа геливю чаналай бара яда буса экономиканы яшыртгъын тармагъына дёне.
Неге тюгюл, шогъар талавургъа белсенип, акъча ва мал-матагь топлайгъан тайпалар чатакъ сала.
Яшырмагъа негер тарыкъ, муна шо саялы да, агьамиятлы милли борчланы талаплары да яшавгъа чыгъарылмай йырыла. Алда йимик ишлемеге уллу заводлар, фабриклер де ёкъ. Топуракъ ва муниципал реформалар юрюмей. Ватандашланы ихтиярларын якълайгъан къурумлар законланы ва низамны ёрукъгъа салма болмайлы, загьматчы халкъ тас этивлеге тарыйгъанлыгъы ойлашдыра.
Озокъда, адам ашамакъ учун яшамай, яшамакъ учун ашай. Тек адам къылыгъына бойсынмайлы, уручулукъ, талавур-тонавчулукъ булан яшайгъан тайпалагъа шо таъсир этмейгени ичингбушдура.
Шо гьакъда Дагъыстанны Президенти Рамазан Абдулатипов да чакъда-чакъда буварывлар этегени англашыла. Талавурчулукъну натижасында иттилешген клас аралыкъланы ёрукълашдырма къаст эте. Республиканы башчысына бир нече байланыкинден эсе минглер булангъы орта мадары булангъы тайпаланы къысматы ювукъ.
Шону гьисапгъа алып, гьали-гьалилерде лап да агьамиятлы 10 ППП (приоритетные президентские программы) къурулгъаны да негьакъ тюгюл.
Озокъда, шоланы арасында «Агропромышленный тармакъны асувлулугъу учун» деген хас программа айрыча ерни тутагъаны да яхшы англашыла.
Неге десегиз, бизин республикабызда загьматгъа гючю чатагъан къуватлы адамларыбызны 60 процентге ювугъу яшай. Тек не этерсен, баягъы, уьстде де эсгерилген кююнде, ерлерде топуракъ ва муниципал реформаланы талапларын яшавгъа чыгъарыв осал юрюле. Заман къолдан чыгъа барагъаны талчыкъдыра.
Гертиден де, намусу булан гьалал ашын къазанма сюеген далаплы адамларыбызны талапларын ва ихтиярларын тергевсюз къойма ярамай.
Шону гьисапгъа алып, 2012-нчи йылны декабр айында Дагъыстан Республиканы Халкъ Жыйыныны сессиясында «Об уполномоченном по защите прав предпринимателей в Республике Дагестан» деген Закон къабул этилинген эди.
Озокъда, шо гьакъда бизин охувчуларыбызны арасында да билмейгенлер, далапчылыкъ булан машгъул болма сюегенлери аз тюгюлдюр. Айтмагъа сюегеним, ач хадирин токъ билмес деп турмайлы, шолай законланы уьйренип, оьз ихтиярларындан пайдаланып бажармакъ гьалиги заманда ким учун да уллу гьюнер санала.
Тюзюн айтгъанда, шолай агьамиятлы законлагъа баянлыкълар-англатывлар бермек бизин учун да сыйлы борч экенин англама герек.
Уьстде эсгерилген законгъа байлавлу болуп гелеген номерлерибизни бирисинде дагъыстанлы предпринимателлени далапчылыкъ булан машгъул болагъанланы ихтиярларын якълайгъан вакили (уполномоченный) Башир Магьамматовну баянын бермеге умут этебиз.
Гележекде бизин охувчуларыбыз да къайсы законлагъа байлавлу баянлыкълар гьазирлеп берсек асувлу болажагъы гьакъда язып билдирсе, пайдалы болур деп ойлайман.
Къ. Къараев.
