Къурувчулар къасткъылып тигеген биналар, къура­гъан ёллар, кёпюрлер ва оьзге объектлер гьар заманда да халкъгъа сююнч гелтире. Избербаш шагьарны С.Юсуповну, А.Акушинскийни, С.Казбековну орамларында яшайгъан юзлер булангъы избербашлылагъа Магьачкъаладагъы «Даггаз» деген къурумну коллективи шолай сююнч савгъат этген.

Эсгерилген орамларда яшайгъан 550-ден артыкъ агьлюлер артдагъы йыллар орамлар булан ерни тюбюнден тартылгъан уллу ва ондан таба яшавлукъ уьйлеге барагъан быргъылардан гелеген газны сасыкъ ийислерин сезме башлай. Шо гьакъда олар объектни есилери гьисапланагъан ОАО «Даггазны» Избербашдагъы филиалыны къуллукъчуларына ва ёлбашчыларына хабар этелер. Къоркъунчлу гьалны олар да артгъа салмай тергегенлер. «Даггазны» ёлбашчыларыны сиптечилиги булан масъала Дагъыстанны Гьукуматыны Председателини заместители В.В.Лемешкону кабинетинде апрелни 25-нде оьтгерилген жыйында гётерилген бу гьалны тюзлемек учун не чаралар гёрмеге герек экени арагъа салынып ойлашылгъан. Табиат газны къоллайгъанланы талабын гьисапгъа алып, жы­йынны жамын чыгъара туруп, республика Гьукуматыны ёлбашчылары ООО «Дагъыстангазпром газораспределение» деген къурумну ёлбашчыларына тувулунгъан гьалны алдын алмакъ муратда 2019-нчу йылны май айыны ахыры болгъунчагъа ОАО «Даггаз» деген къурумгъа ремонт ишлени этмек учун ти­йишли къурулуш материалланы етишдирмекни тапшургъан. Тек, биз англайгъан кюйде, масъала чечилмеген. Умутларына етишмеген избербашлылар да къоркъунчлу гьалны гьакъында дагъы да язмагъа башлагъанлар. Артда сентябр айда ОАО «Даггаз» къурумну Избербашдагъы филиалыны директору Магьамматмурат Абдуллаевни гьаракаты булан аслу къуркъунчлукъ тувулунгъан. С. Юсуповну атындагъы орамны бир кварталында 600 метр мезгилге янгы газ быргъылар тартыла. Акъча маялар ва тарыкълы къурулуш материаллар ёкъ экени себеп болуп, къалгъан кварталлардагъы ва уьстде эсгерилген эки де орамларда этилме гьажатлы ишлер токътатылгъан, яшавлукъ уьйлеге газ да бакъдырылгъан. Тек, нетесен, арадан бир ай да оьтмей, октябрни 22-инде С.Юсуповну атындагъы орамда ерлешген 22 номерли уьйде, эртен сагьат 7-ден айлангъан сонг чыгъып, жыйылып тургъан табиат газ атыла. Уьйню есилери Руслан ва Гьалимат Даниевлер ва оланы 15 йыллыкъ уланы больницагъа тюше. Бугюн оланы савлу­гъуна къоркъунчлукъ ёкъ. Тек яшавлукъ бинасы бузулгъан, абзарындагъы эки машинге зарал болгъан. Агьлюге шагьарны гьакимияты, юртлулары, иш къуллукъчулары, хоншулары кёмек къолун узатгъанлар. Арадан эки гюн оьтюп, ОАО «Даггазны» ёлбашчылары бу орамлардагъы уьйлеге гелеген табиат газны токътата. Себеби англашыла.


Октябрни ахырында чакъгъа салкъын тюшдю. Адамлар уьйлеринде таман чакъы исив болдурма болмай инжине. Оланы гьалекленивюн англамагъа къыйын тюгюл. Эсгерилген орамларда яшайгъан 3000-ден артыкъ избербашлыланы арасында авруйгъанлар, янгы тувгъанлар ва гиччипавлар да бар. Сувукълар биревню де аямай. Газны масъаласы янгыдан гётериле. Избербашлылар шагьарны, республиканы ёлбашчыларына кагъызлар язмагъа борчлу болалар. Шагьарда къувунлу гьал билдириле. Дагъыстанны Гьукуматы резерв фонддан таба тувулунгъан гьалны алдын алмакъ муратда шагьаргъа 19 миллион акъча маялар гёрсете. Тек, гьар тюрлю себеплени табып, ерли администрацияны ёлбашчылары гёрсетилген акъча маяланы къоллап, гьалны тюзлемеге алгъасамайлар.


Умутдан пайда ёкъ экенин билип, избербашлылар, адамлар оьз сиптеси булан агьлюлерден акъча жыймагъа башлай, ишге ОАО «Даггазны» Избербашдагъы филиалын да къуршай. Тувулунгъан гьалны, халкъны къыйынларын гёрген «Даггазны» ёлбашчылары башында генеральный директору Магьамматгьюсен Насрутдинов да булан не этип де ёрукъгъа гелтирмеге чаралар гёрелер. Акъча маяларсыз къурулуш сметалар гьазирлене. Бир-эки гюнню ичинде орамларда жанланыв башлана. Магьамматгьюсен Насрутдиновну буйругъу булан Избербашгъа Къарабудагъгент, Къаягент районлардагъы филиаллардан да шагьар горгазны къуллукъчуларына кёмекге дагъы да дёрт хас бригада геле.


– Ишлер шулай чалт юрюлежегине инанмай эдик, – дей С.Юсуповну атындагъы орамда яшайгъан избербашлы Гьажиали Гьажиев. – Сав оьмюрюм сварщик болуп загьмат тёкгенмен. Мунда ишлегенлеге оьз ишини герти усталары деп айтма ярай. Этеген ишине сёз ёкъ.


Газ тартыв булан машгъул бригадаланы арасында Къарабудагъгентден гелген сварщик­лер Магьаммат Ибрагьимовну, Абдулкъадир Багьавовну, слесарлар Камил Агьматовну, Руслан Акайчиевни, Уразали Алибековну, шофёр-слесарлар Бадырхан Акайчиевни, Алимурат Алиевни атларын айрыча эсгермеге тийишли. Оланы барысы да гечесин-гюнюн бир этип дегенлей загьмат тёкдюлер. Тарыкълы къурулуш материалланы булагъа Къарабудагъгентдеги «Приморское» деген управлениени ёлбашчысы Али Багьавов, баш инженери Илмутдин Атагишиев токътавсуз етишдирип турдулар. Оьзге кварталларда да къалгъан бригадалар уллу гьаракатчылыкъ гёрсетдилер. Къыйынлы гюнлерде къурулуш объектлерде ОАО «Даггаз» къурумну бёлюгюню ёлбашчысы Рашит Атагьажиевни, ОАО «Даггазны» Избербашдагъы филиалыны директору Магьамматмурат Абдуллаевни, баш инженери Бийбола Зайнутдиновну даим иш уьстде гёрюп турдукъ. Гьасили, бир жуманы ичинде, ноябрни 15-нде, таза инжинген кёбюсю избербашлыланы уьйлерине табии газ янгыдан гелди. Артдагъы эки-уьч гюнден янгурлар башланды, олар булан сувукълар да гючленди. Тек чакъ бузулгъанына да къарамай, ишлер бугюн де давам этиле. Бийбола Зайнутдиновну айтывуна гёре, уьч жуманы ичинде уьстде эсгерилген орамларда 3500 метр мезгилде янгы газ быргъылар къурашдырылгъан, тийишли болагъан оьзге газ ясандырывлар салынгъан.


Шоланы тезликде къурмагъа бажаргъан газовиклени яхшы ишлери гьакъда айта туруп, биз олагъа эсгерилген орамларда яшайгъанланы сыкълашдырып, къурувчулагъа чалт кёмек этмеге бажаргъан Мурат Абдужалиловну, Батырхан Гьажиевни, Шамил Айвазовну, Арсланали Адаевни гьюрмет булан эсгеребиз. Халкъ бирлешсе, эл тувар деп негьакъ айтылмагъан.


Энни къыйынлы гюнлер артда къалды. С.Казбековну, С.Юсуповну орамларында яшайгъанланы гёнгю хош. Шо къуванчны гелтирмеге бажаргъан ОАО «Даггаз» деген респуб­лика къурумну ёлбашчысы М. Насрутдиновгъа ва шолай да район, шагьар филиалларыны коллективлерине избербашлыланы атындан гьакъ юрекден кёп савболугъуз демеге сюебиз.


 

Магьамматрасул ИБРАГЬИМОВ.

Избербаш.