Мычыгъыш Республикадагъы Борагъан деген къумукъ юртда яшайгъан, охуйгъан ва Бютюнроссия ярышланы чемпиону Азнавур ХАСАВОВ булангъы гиччирек лакъырлашывну яшланы тергевюне беребиз.
– Азнавур, гюн яхшы болсун! Башлап таныш болайыкъ, сагъа нече йыл бола? Къачандан берли ва къайсы спорт булан машгъулсан?
– Гюн яхшы болсун! Гьали магъа 14 йыл битди. Мен «Киокушин» деген каратэ ябушув булан 11 йыллыкъ чагъымдан берли машгъулман. Бу спортгъа атамны кёмеги булан гелгенмен. Ол мени лап биринчи бу ябушув спортгъа чыныкъдыргъан.
– Биринчилей оьр савгъатгъа (биринчи ерге) къайда ес болдунг?
– Биринчи алтын медальны мен Россияны Анапа шагьарында оьтгерилген Бютюнроссия ярышларда алдым.
– Оьтгерилеген ярышларда сагъа не йимик четимликлер ёлугъа ва къайсы къужурлу ярышлар эсингдедир?
– Лап да къыйыны, ярышлар юрюлме башланагъан вакъти къаркъарамдагъы гьалекликни басылтма къыйын бола. Сонг да, лап эсимде къалгъан ябушув – Мычыгъыш Республикада «Агьмат-Ичигекиде» оьтгерилген ярыш.
– Сен дагъы къайсы спорт булан машгъулсан ва къайсы спортну кёп сюесен?
– Мен гиччиден берли аякъларымны силлеп ойнама кёп сюе эдим. Шо саялы каратэ ябушувну сюемен, башгъа тюрлю спорт булан машгъул тюгюлмен.
— Спорт булан тыгъыс байлавлу ва сен бек ушатагъан адам кимдир?
– Буссагьатгъы «Ичигеки» деген спортдан савлай дюньяны бютюнлей чемпиону Лечи Къурбанов. Ол мен лап кёп сюеген спортчу.
– Сени бу ябушувгъа уьйретивчюлеринг кимлердир ва къайда гьазирленесен?
– Мени оьтгерилеген ярышлагъа гьазирлейген – Арслан Мамаев ва Лечи Къурбанов. Ярышлагъа мени ата юртум Борагъанда да ва «Агьмат-Ичигекини» академиясында да тренировкалагъа юрюймен.
– Ярышларда биринчи ерге ес болмакъ учун не герек?
– Мен ойлашагъан кюйде, къайсы яшны да спортгъа гьасиретлиги ва оьз оьзюне толу инамлыгъы да болмагъа герек.
– Сен оьзюнг ярышлагъа гьазирленеген вакъти не йимик муратланы алдынга саласан?
– Нечакъы къыйын болса да, утма, биринчи ерни алма гьаракат этмек. Мени булан ярышгъа чыгъагъан яшлардан артыкъ ябушуп билме къасткъыламан. Шо саялы да, яхшы ябушуп билмек учун, кёп ишлеме тюше.
– Сен ортакъчылыкъ этген ярышланы натижаларына разимисен?
– Гьаракатыма гёре, дюрмен.
– Гележекде де бу сен айыргъан спортгъа байлавлу не йимик умутланы гёз алгъа тутгъансан?
– Москвада оьтгерилежек ярышларда ортакъчылыкъ этме умутум бар.
– Сен яшавунгну янгыз спорт булан байлама сюемисен яда башгъа ёл булан да машгъул болма умутларынг бармы?
– Тюзюн айтсам, мен о гьакъда гьалиге гёз алгъа тутгъан умутларым ёкъ. Заманы гелгенде ойлашма тюшер.
– Гьалиге спорт тармакъда не йимик уьстюнлюклеге етгенсен?
– СКФО-ну савгъатын алгъанман, Бютюнроссия ярышланы да чемпиону болгъанман, ЮФО-ну чемпионуман, Мычыгъыш Республиканы Грозный шагьарыны багьалы савутуну (кубок) чемпионуман ва «Кубок Агьмата» деген академияны чемпиону да дюрмен.
– Азнавур, кёп савбол, мен сагъа гьалиги ёлунгда уллу уьстюнлюклер ёрайман. Юрекдеги бары да умутларынг яшавгъа чыкъма Аллагь насип этсин! Гьали энни ёлдашларынга ва спорт булан машгъул болма сюеген яшлагъа не ёрар эдинг?
– Сизге де Аллагь рази болсун! Мен ойлашагъан кюйде, гьар адам юреги не сюе буса, шону булан машгъул болмагъа герек. Сонг да, ата-анагъа тынглап юрюсе яхшы. Спорт булан машгъул болгъандан сонг, сени ябушма уьйретеген тренерлеге тынглама тарыкъсан. Сени къастынг да ва оланы кёмеги де оьрленме кёмек эте.
Разият.
«Ватсапдан» таба лакъырлашыв.
