Уругъа уьйренген къол къайда да сугъула. Гьалиги заманда яшавлукъ-коммунал къуллукълардан пайдаланывну умуми кюйде токъташдырылгъан низамын бузуп, табии ягъарлыкъ газны, сувну ва электрик токну оьз пайдасы учун гьагъын тёлемей къоллайгъанлар Дагъыстанда да аз къаршылашмай.
Озокъда, оланы яшав даражалары да башгъа-башгъа. Гючю озагъан тайпалар ломай кюйде, оьзгелери буса амалсызлыгъындан урламагъа муштарлы болагъаны англашыла.
Ягъарлыкъны къоллавну низамын бузагъанланы санавун аянгъа чыгъармакъ учун, «Экономиканы ачыкълыгъы учун» деген милли проектни оьлчевюнде артдагъы йылларда кёп тергевлер оьтгериле ва шоланы натижалары аянлашдырыла.
Гьали-гьалилерде «Газпром межрегионгаз Махачкала» деген ихтиярлары дазуландырылгъан акционер жамиятны ва шолай да «Газпром газораспределение Дагестан» деген акционер жамиятны къуллукъчуларыны янындан 2022-нчи йылны башындан тутуп, ягъарлыкъдан пайдаланывну низамын бузагъанланы аянгъа чыгъармакъ муратда тергевлер оьтгерив узатыла.
Арадан оьтген вакътини ичинде оьтгерилген тергевлени натижалары малим этеген кюйде, бу йылны башындан тутуп, ватандашланы ва къурумланы ихтиярларын якълайгъан къуллукъчуларын да къуршап юрюлген тергевлени натижасында 2300 гезикде ягъарлыкъдан пайдаланывну низамын бузувлар болгъаны токъташдырылгъан ва йиберилген кемчиликлени алды алынгъан.
Айрыча адамланы янындан низам бузулгъаны саялы, ихтиярланы якълайгъан къурумлагъа 2293 ва къурумлагъа къаршы къурулгъан 260 хас материал бакъдырылгъан. Оьтгерилген тергевлени натижасында табии газ ягъарлыкъ юрюйген линиялагъа тюпден таба къошулгъаны саялы 1337 протокол къурулгъан. Шоланы арасындан экинчи гезикде къошулгъан 631-не къаршы уголовный ишлер ачылгъан.
Муна шо саялы да уруну арты къуру деген кюйде, ягъарлыкъны оьзбашына алып къоллайгъан тайпалагъа умуми низамгъа гьюрмет булан янашмаса бажарылмай.
Къ. КЪАРАЕВ.
