Ягъарлыкъгъа харлылагъа кёмек этиле

Савлай уьлкебизде йимик, бизин республикабызда да артдагъы вакътилерде оьз мадарын этмеге четим, харж якъдан гючю етишмейгенлер къаршылаша. Олар учун «Социальная газификация» деген программа РФ-ни Президенти Владимир Путинни сиптечилиги булан къурулгъан ва пайдаландырывгъа берилген. Шогъар байлавлу болуп гьалиги заманда бизин республикабызда да табии газ ягъарлыкъгъа харлы, яшав даражасы осал тайпалагъа пачалыкъны янындан къайтарыш гьисапда харж булан кёмек этилине.

Эсгерилген программаны талап­лары Дагъыстанда нечик ва некъадар яшавгъа чыгъарыла? Шогъар­ ва шону булан байлавлу арагъа чыгъа­рылагъан масъалалар аз тюгюл. Артдагъы гюнлерде «Дагъыс­тан» деген республика маълумат агентлигинде «Газпром газораспределение Дагестан» деген ихтиярлары дазуландырылгъан жамиятны баш­чысы Олег Чиглинцев ва Росреестрни Дагъыстанда иш гёреген управлениесини башчысы Арсен Пирмагьамматов ёлдашлар президент программаны яшавгъа чыгъарылыву гьакъда республикабызны маълумат къуралларыны къуллукъчуларына баянлыкъ берди. Белгили болгъан кюйде, гьалиге ерли Да­гъыс­танда шо программагъа гёре 167 уьйге табии газ тартылгъан.

Программа пайдаландырывгъа берилгенден сонг къурулгъан план-графикге газ тартмакъ учун уьй есилерден 2200-ге ювукъ арза къабул этилинген. Еслик этив документлери тюз къурулмагъаны саялы, 400-ге ювукъ арза гери урулгъан.

– Оьтген сынав ташдырагъан кюйде, Дагъыстанда оьз топуракъ пайындагъы еслигине-мюлкюне газ тартмакъ учун гьар уьй еси 160 минг манат харж этмесе бажарылмай эди, – деп узатды оьзюню сёзюн Олег Чиглинцев. – Шондан къайры, газлашдырывгъа байлавлу болуп ерли муниципал къурулувларыны янындан да гьар тюрлю къуллукъланы кютмесе болмай. Шону учун ДР-ни загьмат ва яшавлукъ министерлигини янындан яшав даражасы осал агьлюлеге пачалыкъ кёмек гьисапда 90 минг манаты къайтарыш этилип бериле. Тюзюн айтгъанда, топуракъ пайлардагъы уьйлени есилерини толу ихтиярлы документлери етишмей. Муна шо саялы да программаны яшавгъа чыгъарыв учун юрюлеген ишлени барышына четимликлер тувулуна.

Уьй есилени документлери тюз къурулмагъаны саялы, оланы заманын аяп гьисапгъа алмакъ учун бир жуманы орнуна 3 гюн болжал белгиленгени гьакъда да Арсен Пирмагьамматов айрыча эсгерди. Шогъар байлавлу болуп ерлердеги гьакимият къурумланы янындан хозяйство китаплардагъы язывла­гъа асасланып, Росреестрге тапшурма тийишли кагъызланы оьз заманында етишдирив агьамиятлы. Эсгерилген программаны ортакъчысы гьисапда уьй есилери учун къурулгъан хас сайтдан таба эркин кюйде маълумат алмагъа бола.

Къ. КЪАРАЕВ.
Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля