Къазанчы – гьаракатгъа гёре


       Совет къуруму тозулгъанда заводлар, фабриклер ва оьзге пачалыкъ къурумлар бузулма башлагъанда, кёплер ишсиз къалдылар. Лап жигерлилер оьзбашына иш гёреген далапчылыкъ булан доланмагъа башладылар. Эки мингинчи йылланы башында Къоркъмаскъала юртда яшайгъан Рашит Кълычев де иннемей турмай, оьзлер яшайгъан уьйлени биринчи къабатында ашамлыкъ маллар сатагъан гиччирек тюкен ача.



– Оьзбашына чалышагъан далапчы гьисапда ишлейгеник айтардай узакъ болмай. Уьйлерибизни биринчи къатында, «Айташ» деп ат да салып, ашамлакъ маллар сатагъан тюкен ачгъан эдик. Сонг уллу, эркин этип янгы тюкен ачдыкъ. Ону да къырыйында жыжымгъа къызаргъан тавукъ, чудуланы тюрлю-тюрлюсюн, экмек-аш биширеген ер этдик, – деп хабарлай Р. Кълычев.


Рашитни уланы Рустам, къызы Апам, къатыны Дина, гелини Мадина, къатыныны къызардашлары Зугьра ва Вазипат – булар бир агьлюдей болуп «Айташда» ишлей.


Мунда эт, къарын, бишлакъ, халта ва дарги чудулар бишириле. Булар аслу гьалда алывчуланы заказларына гёре ишлей. Алывчулар булан телефон байлавлугъу да бар. Адамлар телефондан таба тарыкъ ашын заказ эте. Тойлагъа ва оьзге тюрлю жыйынлагъа да ашамлыкълар гьазирлей, ички, сигарет сатылмай. Бары къатыкъ ва ашлар сан янлы продукталардан татывлу кюйде этиле.


– Осал ашамлыкъ маллардан ашлар этсек, биз оьзюбюзню алывчуларыбызны тас этебиз. Ону учун да тюкенге бары сурсат маяланы сачып лап тизивлерин алабыз, – дей Рашит. – Сонг да, этни, тавукъну, балыкъны багьалыларын алсам да, олардан биширилген ашланы багьаларын оьзгелерден эсе артдырып сатмайбыз. Бизин агьлю коллективни аслу мурады – сан янлы ашланы биширмек, алывчуланы талапларын кютмек.


– Иш низамгъа нечик тергев бересиз?


– Иш башлайгъан, иш битеген заман эшикге язылып салынгъан. Шо замангъа гёре, геч болмайгъан кюйде, тюкенни ачмагъа, алывчуланы башгъа тюрлю заказларын оьз заманында этмеге белсенгенбиз. Сюйгенде ачып, сюйгенде ябып турсакъ, алывчуну тас этебиз. Къатты низам ва ёрукъ янгыз сатыв-алывда тюгюл, оьзге тармакъларда да болмагъа герек. Бизде жыжымгъа къызартылгъан тавукъ – 370 манат, балыкъны килосу – 380 манат, пиццалар, дарги чуду – 250 манат, эт чуду –100 манат, оьзге чудулар – 80 манат, шаурма – 100 манат.


Рашит Кълычев ёлбашчылыкъ этеген оьзбашына чалышагъан «Айташ» деген далапчы коллектив юртда лап да учуз, татывлу ашлар биширеген кафе ачмагъа да сюе. Шону эки къабат бинасын ювукъ заманны ичинде битдирмеге умут эте ва кафеге ишге охугъан, иш сынаву булангъы ашбаз да тапмагъа умут эте.


Ашы да татывлу, къашы да ачыкъ бу дос агьлюге гележекде оьзлени гьалал загьматы булан оьрлюклеге етмекни ёрайман. Далапчыны къазанчы – гьаракатына гёре дегенлей, бай бол­угъуз, бар болугъуз деп айтмагъа сюемен.

СУРАТДА: Рашит КЪЛЫЧЕВ уланы РУСТАМ булан жыжымда тавукъ, балыкъ къызартагъан вакътиси.

Авторизация
*
*
Регистрация
*
*
*
Согласны с условиями сайта?
Генерация пароля