Къумукъ язывчулар – Уллу Ватан давда
Дагъыстанны халкъ шаири, РСФСР-ни маданиятыны ат къазангъан къуллукъчусу Абдулвагьап СУЛЕЙМАНОВ Яхсайда 1909-нчу йылда тувгъан.
Дербентдеги педагогика училищени битдиргенде школаларда ва редакцияларда ишлей. Яшдан берли шиърулар язагъан Абдулвагьап биринчи шиъруларын «Ёлдаш» газетде 1926-нчы йылда чыгъара. 1930-нчу йылда ону «Инкъылапны толкъунлары» деген шиъру китабы чыгъа. 1939-нчу йылда СССР-ни Язывчуларыны союзуна къабул этиле.
Уллу Ватан дав башлангъанда, берилген «бронгъа да» къарамай, давгъа гете. Буланы дивизиясын Япония булангъы гьал бузукъ экенге, дазуланы сакъламагъа Йыракъ Гюнтувушгъа йибере.
Офицер курсланы битгендокъ, Абдулвагьап Сулейманов 416-нчы Къызылбайракълы Таганрог атышывчу дивизияны политика бёлюгюню агитатору болуп белгилене.
Япониядан къоркъунчлукъ ёкъ экени белгили болгъанда, дивизияны дав бар бойгъа сала. Ростов областны ва Таганрог шагьарны немислерден азат этип, дивизия Украинагъа чыгъа. Донецк областны Константиновка ва Херсон областны Большая Лепетиха деген шагьарларын алагъан гючлю давларда ортакъчылыкъ этген дивизияны асгерчилери савгъатлана. Абдулвагьап Сулеймановгъа Къызыл Юлдуз орден бериле. Савгъатлав кагъызында шулай сёзлени охума болабыз:
«Капитан Абдулвагьап Сулейманов солдатланы игитликге янгыз ялынлы сёзлер булан ругьландырмай, давгъа биринчи оьзю тюше. 4-нчю февральда Константиновка шагьарны, 8-нчи февральда Херсон областда ол башчылыкъ этип, Большая Лепетиха деген район центрны алдылар. Днепрдан да ол биринчилерден болуп ариги янына чыкъды. Шо игитлиги учун А.Сулейманов Къызыл Юлдуз орденге гёрсетиле».
416-нчы дивизия Кавказдан Берлинге ерли баргъан. Ол Ватан давну II даражалы орден ва кёп санавдагъы медаллар булан савгъатлангъан.
Давдан сонг Абдулвагьап Сулейманов Москвада редактор-таржумачы курсланы битген, 1946–1949-нчу йылларда Дагъыстанны Язывчуларыны союзуну председатели, «Ёлдаш» газетни редакторуну орунбасары, Къумукъ театрны директору болуп ишлеген. Ол 30 китап чыгъаргъан, 10-гъа ювукъ пьеса язгъан, кёп санавдагъы шаирлени ва драматургланы асарларын къумукъчагъа гёчюрген.
Абдулвагьап Бектемирович Сулейманов 1995-нчи йылда гечинген.
