– Юртда загьмат тёгеген къайсы касбучулар енгилликлер булан пайдаланмагъа бола?

– Муаллимлер, врачлар, фармацевтлер, ветеринар къуллукъчулар.

– Шолагъа не йимик енгилликлер бар?

– Ярыкъгъа, ягъарлыкъгъа, яшавлукъ этеген уьйге.

– Алда шо енгилликлер толу кюйде дегенлей этиле эди. Гьали олай болмаса, булай болмаса деп, шо масъаланы алдына чыкъма четим тогъаслар салына.

– Масала?

– Масала, электроэнергияны къоллавда гесимлер салынгъан. Шо гесимден артыкъ буса, къуллукъчу оьзюню янындан тёлемеге герек. Ягъарлыкъгъа бакъгъан якъда да шолай. Мунда ёлугъа­гъан четимликлер дагъы кёп. Газ йимик ягъарлыкъ да – уллу ниъмат. Тюзю, тюзлюкде ерлешген юртлагъа, тавтюп бойда ерлешген юртлагъа да шо ниъмат етишген. Амма етип битмеген юртлар да бар. Шолай юртларда яшайгъанлар кёмюр, агъач якъма борчлу бола. Тав районланы кёбюсюне эсгерилген ниъмат етишип битмеген юртлары кёп. Кёмюрню бир тонуну багьасы 5 минг манатдан да артыкъ.

– Шону багьасын – тарифин ким токъташдыра?

– Шону ихтияры ООО «Дружба» деген жамиятгъа ва Буйнакск шагьардагъы ягъарлыкъ малланы предприятиесине берилген.

– Эсгерейик, – дей Магьаммат­рагьим Рагьимов, – кёмюр респуб­ликагъа тийишли оьлчевню 20 проценти тюгюл гелмей.

– Сонг да, этилген «гьава­йын къуллукъгъа» квитанция алмагъа, оланы, йыракъ деп къарамай, тийишли идарагъа етишдирмеге герек.

– …Охувчуларыбызгъа етишдирейик, Басир Межитович Мирзаев бу масъалалагъа байлавлу эркин макъала язмагъа сёз берген. Шо «Ёлдашда» гелеген номерлени биринде печат этилежек.



А. ДАЛГЬАТОВ.