Каспий денгизни ягъасындагъы центрны бинасында 210 ери булангъы гечеси-гюню булан турмагъа болагъан эки къабат бина ерлешген. Яшланы савлугъун къолайгъа къайтармакъ учун этилген тренажёр зал, массаж этеген кабинет, физиотерапия курслар оьтгерилеген уьй бар. Сонг да, 100 яш ашап болагъан ашханасы да бары яшлар учун онгайлыкъланы ярата. Бир-бир къыйын гьаллагъа тюшген, савлугъу осал экени саялы, яшавда бары да имканлыкълардан пайдаланып болмайгъан яшлар бу центрда оьзлеге ер таба.
Буссагьатгъы заманда бу центрда Дагъыстанны гьар тюрлю ерлеринден гелген 200-ден де артыкъ яш оьзлени савлугъун къолайгъа къайтармакъ учун гелген. Бу йылны август айыны 8-нде маълумат берив къуралланы къуллукъчулары бу центргъа баргъан. Олар центрда ял алагъан яшлар булан таныш болгъан. Сонг да, олар гьар кабинетге барып, савлугъу осал яшлагъа не кёмек этилегенин гёргенлер.
Пачалыкъны янындан савлугъу осал яшлагъа этилеген кёмек ва тергев йылдан-йылгъа сан янлы болмагъа тюшегенин яшав оьзю гёрсетип тура. Булай центрлар ачылып, шо гьаллагъа тюшген яшлар якълав табагъаны не яхшыдыр деген ойда къаласан.
Б. Оьлмесова.
Суратда: центрдагъы яшлар булан
оьтгерилеген ишни вакътиси.
