ДР-ни Халкъ Жыйыныны оьтген сессиясында «Дагъыстан Республикада кёп квартирлик уьйлерде яшайгъанлагъа уьйлени ярашдырывну гьакъындагъы» законгъа алышынывланы законну проекти къабул этилген. Шо документ айры-айры ватандашлагъа кёмек учун этиле. О законну проекти Халкъ Жыйыныны къурулуш, яшавлукъ-хозяйство, транспорт байлавлукълагъа къарайгъан комитетде шо тармакъгъа гиреген вакиллени ортакъчылыгъы булан къаралгъан.
Регионну къурулушлагъа, архитектурагъа ва яшавлукъ хозяйствогъа къарайгъан министр Ибрагьим Къазибеков айтгъан кюйде, документ федерал законну янгы талапларыны нормасына гёре гьазирленген. О ватандашланы бир нече категориясына умуми магь-матагьгъа ремонт этмек учун бериле. «Яшавлукъ уьйлерде турагъан, ишлемейген, оьзлеге 70 йыл болагъан уьй есилерине 50 процентни оьлчевюнде, 80 йыл болагъанлагъа, олай да агьлюде бирче яшайгъан пенсия чагъындагъы ватандашлагъа ремонтгъа берилеген акъча 100 процент къайтарышы болажакъ. Шолай нормалар уьлкени кёп регионларында къоллана»,– деп билдирген министр.
Шо законну яшавгъа чыгъармакъ учун бюджетде акъча гёрсетилгенми ва не оьлчевде гёрсетилген деген соравну ЖКХ-ны комитетини председатели Нюрмагьаммат Алиев берген. Огъар министр берген жавапда айтылгъан кюйде, законну къабул этген сонг, республиканы бюджетинде 12 миллион манат гёрсетилме герек. 2018-нчи йылгъа къабул этилген бюджетге шо алышынывну этме герек болажакъ.
Бизин маълумат.
