Конференцияны ачды ва юрютдю ДР-ни Башчысыны ойчусу Камил Ланда. Биринчи сёз милли политикагъа къарайгъан министр Татьяна Гамалейге берилди. Ол айтгъан кюйде, террорчулукъгъа къаршы ябушув янгыз гючню къоллайгъан министерликлени иши тюгюл, ишни яшавгъа чыгъарагъан гьакимликни иши де дюр. Бары да жамиятыбыз булан террорчулукъгъа къаршы ябушмасакъ, гьар ватандаш террорчулукъну маънасын англамаса, биз ондан уьстюн гелип болмажакъбыз. Шо саялы террорчулукъгъа къаршы маълумат къураллар биригип иш гёрме герек.
Конференцияны алдына салынгъан аслу масъала террорчулукъ Россиягъа, олай да Темиркъазыкъ Кавказгъа гелтирме болагъан къайгъыны алдын алмакъ булан байлавлу эди.
Дагъыстан пачалыкъ университетни проректору Назир Ашурбеков террорчулукъ масъала булан университет кёп йыллар машгъул болагъанны гьакъында айтды.
– Биз бугюн террорчулукъну масъаласы жамиятны алдына салынгъан аслу масъала экенни англайбыз. Шо аврув Сирия, Иракъ йимик пачалыкъланы гележегин мекенсиз этген. Шо саялы о масъалагъа маълумат къураллар да къаршы ябушма гереги агьамиятлы, – деди Н. Ашурбеков.
Республиканы Башчысыны ойчусу К.Ланда айтгъан кюйде, тыш пачалыкъланы маълумат къуралларыны ва Россияны къураллары да исламны шу масъалагъа байлавлу маънасын тюз англамай. Пресса «жигьат», «шагьит» деген сёзлени террорчулукъ булан байлап тюз этмейлер. Исламда адамны оьлтюрювге чакъырыв ёкъ ва ислам шо гьалгъа къаршы. Шагьит – Аллагьны ёлунда оьлюп гетген адам. Оьзюн ва башгъаланы оьлтюреген адамгъа шагьит деп айтылмай, деди.
Дагъыстанны илму центрыны социологу З.Абдулагьатов ихтиярланы якълавчуларыны башчылары ва башгъалар гелтиреген бир-бирине къыйышмайгъан сынавлагъа тамаша болагъанны гьакъында айтды.
Аслу жыйындан сонг, «Дагъыстанда жинаятчылыкъны оьсювю», «Ислам пачалыкъгъа ва Сириядагъы дав агьвалатлагъа дагъыстанлыланы янашыву», «Халкъны Кавказда ислам пачалыкъ деген сёзге янашыву» йимик темалагъа гёре конференция ишин секцияларда узатды.
А. Гьамзаев.
