Къоллавчулар учун пайдаландырывгъа берилеген шулай агьамиятлы социал-экономика объектни ачылывуна байлавлу болуп оьтгерилеген шатлыкъ жыйында, айлана якъдагъы чакъны сувукълугъуна да къарамайлы, кёп халкъ гелген эди. Неге тюгюл, шулайлыкъда, пачалыкъны ва айрыча иш гёреген компанияланы арасындагъы байлавлукълар беклеше.
Шатлыкъ жыйынны ачгъан «Газпром трансгаз Магьачкъала» деген компанияны генеральный директору Керим Гьюсейнов биринчи сёзню Лев Кузнецовгъа берген.
– Гележекде де «Газпром» дагъыстанлы къоллавчуланы талапларын гьисапгъа алып иш гёрежегине мен инанаман. Тек къоллавчулагъа да оьзлер учун этилинеген къуллукъланы, ерге урмай, тийишли гьагъын тёлесе, эки арада гележекде де разисизликлеге ёл берилмес, – деген ол.
СКФО-ну ишлерине къарайгъан министри айтгъан сёзлеге Дагъыстанны Башчысы Рамазан Абдулатипов да разилигин билдирген.
– Гертиден де, шулай объектлени къурулушу ва ишге бериливю Дагъыстангъа ва ону тахшагьарына янгы йылны алдында лайыкълы савгъат, – деп, ол узатгъан сёзюн. – Шо саялы да «Газпромну» башчысы Алексей Миллерге ва шолай да Керим Гьюсейновгъа гележекде де шу кюйде къоллавчуланы талапларын гьисапгъа алып этеген гьаракатында уьстюнлюклер ёрамагъа сюемен.
Белгили болгъан кююнде, «Чапаево» деген янгы станция аслу гьалда янгы Новолак районну къоллавчуларыны табии ягъарлыкъгъа бакъгъан якъдагъы талапларын кютюв булан машгъул болажакъ. Шону учун онгайлыкъланы болдурувда эсгерилген компания йимик республика бюджетден айырылгъан акъча маялар да берилгени гьакъда айрыча эсгермеге тюше.
Шолайлыкъда, Новолак райондагъы беш юртда яшайгъан 15 мингден де къолай адамгъа къышны алдында табии ягъарлыкъ йиберилген.
Къ. КЪАРАЕВ.
СУРАТДА: Лев Кузнецовну, Рамазан Абдулатиповну ва Керим
Гьюсейновну янгы станцияны ачылывунда ортакъчылыкъ этивю.
