Гьали-гьалилерде Къазахстан республиканы Астана шагьарында VI халкъара гьакъыл (интеллект) конкурсну гьасиллери чыгъарылды. «Харлысыз пачалыкъланы бирлигини яш алими – 2022» деген атны алмакъ учун шо пачалыкъланы яш алимлери илмуну тюрлю-тюрлю агъымларында оьзлени гьакъылын гёрсетген. Оьтгерилген конкурсда гьали Таргъуда яшайгъан паравуллу Магьамматамин Акъаев де ортакъчылыкъ этген.
Магьамматамин Дагъыстан пачалыкъ медицина университетни ординатору ва Дагъыстан пачалыкъ халкъ хозяйство университетини 5-нчи курсуну студенти де дюр. Ол бир нече йылланы узагъында тюрлю-тюрлю конкурсларда ва конференцияларда ортакъчылыкъ этген ва савгъатлы ерлеге ес болгъан.
– СНГ-ни яш алимлерини конкурсу илмуну янгы, кёп адамгъа малим этме болагъан агъым, – дей Магьамматамин Акъаев. – Шулай конкурслар яш алимлеге белгили адамланы алдында сёйлеме, олар булан гьаллашма кёмек эте. Ахтарыв ишлеринг нечик къыйын буса да, оланы насигьатлары сени ругьландыра деп эсиме геле.
Конкурсда Магьамматамин Акъаев яшав-туруш масъалалар яшёрюмлеге нечик таъсир этегенни гьакъында ахтарыв юрютген ва шолагъа янашыв нечик экенин токъташдыргъан. Бирев де этмеген ахтарыв иш конкурсну жаваплы адамларын тамаша этген ва Магьамматамин Акъаевге 1-нчи ер берилген.
– Мен ахтаргъан гьал гьалиги заманда инг де аслу деп гьисап этемен, – дей бизин булангъы лакъырында Магьамматамин. – Неге тюгюл де, яшёрюмлер бары да маълуматны Интернетни торундан ала, шонда буса не де бар. Инг де яманы, Интернетни тору оьзюне тарта ва харлы эте, шондан айрылма буса эпсиз къыйын.
Савгъатны Магьамматамин Акъаевге МВД-ни полковниги, Дагъыстанны ва Россия Федерациясыны Игити Дибиргьажи Гьасанович Магьамматов тапшургъан.
«Ёлдаш» газетни редакциясы Магьамматамин Акъаевни оьр савгъаты булан къутлай туруп, илмуда дагъы да гёрмекли оьрлюклеге етмекни ёрай!
