Тюзю, студентлени охувгъа иштагьландырмакъ учун олагъа кёп имканлыкълар да, онгайлыкълар да болдурулгъан. Айтагъаным, студентлени кёбюсю, уьч къыймат алмай охуйгъанлары, дарс беривчюлени алапасындан да артыкъ стипендия алагъан болгъан. Оланы арасында бир семестрны ичинде 200-300 минг манатны топлайгъанлары бар.
Ондан къайры да, олар учун грантлар гёрсетиле, гьар тюрлю конкурсларда ортакъчылыкъ этме болалар. Олай да, яхшы охуйгъанлагъа санаторийлеге барма путёвкалар да гёрсетиле. Охума сюегенлеге хыйлы енгиликлер де бар. Амма, ичинде бираз сама жыжыгъы ёкълар, нелер этсе де, къолуна китап алып да авара болмажакълар. Мен оланы гьакъында лакъыр этме сюймеймен.
Дагъыстандан тыш янгъада чыгъып, кёплени бурнуна сув тийдирип болагъан жанлы бир уланыбызны уьстюнлюгю гьакъда айтмагъа сюе эдим. Гертиси, Бабаюрт райондан гёрмекли адамларыбыз аз чыкъмагъан.
Жагьиллени арасындан Бабаюртдан чыкъгъан итти гьакъылы булангъы оьткюр улан Насрутдин Насрутдинов «Военная медицина» бёлюкден «Инг де яхшы илму иш» деген бютюнроссия конкурсда ортакъчылыкъ этген.
Бираз алда Санкт-Петербургда Россияны билим берив министерлигини военный билим береген оьр ожакъларыны курсантларыны ва офицерлерини «Военная медицина» бёлюгюнден инг де яхшы илму ишлеге байлавлу конкурс оьтгерилген.
Шонда бизин къумукъ улан, Военная медицина академияны курсанты актив кюйде ортакъчылыкъ этип, академияны грамотасы булан савгъатлангъан. Ол онда «Сокращённое ультразвуковое исследование в диагностике пневмоторакса при травме груди на этапах медицинской эвакуации» деген темагъа гёре доклад этген.
Военная медицинада илму ва практика чалышывгъа аслу тергев этиле. Олар асгер къуллукъчуланы савлугъун сакълавда ва ону беклешдиривде айрыча жаваплыкъны гьис этелер. Военная медицинада ишлейгенлер асгерчилени уьстюнде туруп дегенлей, аврувларыны алдын алмагъа, оланы бакъмагъа белсенип айланма герек. Дав болуп гетсе, заралангъанланы тийишли кюйде гьайын этип, оланы ябушмагъа гючюн сакълама тарыкъ бола.
Бизин бир тайпа яш наслугъа, орамланы гечеси-гюню булан оьлчеп айланмай, тыгъырыкъ-тыгъырыкъда турмай яда террорчулукъну торуна тюшмей, Насрутдин йимиклерден уьлгю алма ярамаймы экен? Олай уланланы парахат кюйде дюньяны бир къырыйына да бакъдырма ярай. Насрутдин йимик уланлар ва къызлар оьзлер чыкъгъан районун да, республикасын да оьр даражада гёрсетме бажаралар. Олайлар биревню де бетин къара этмейгенге инанабыз. Бабаюртлу улан Насрутдин Насрутдиновну энниден сонг да дагъы да кёп уьстюнлюклери болажакъгъа бирдокъда шеклик этмейбиз.
Паху ГЬАЙБУЛЛАЕВА.
СУРАТДА: (солдан онггъа биринчиси)
Н. Насрутдинов.
