Къумукъ адабиятда Анварны яратывчулугъу гёрмекли ерни тутгъан. Огъар къумукъ поэзияны сигьручусу (чародей) деп де айталар. Бу гезик Къумукъ театрны коллективи онгаргъан ва гёрсетген «Родник» деген музыкалы-поэзия композицияны жыйылгъанлар разилик булан къаршылады. Мунда шаирни яшавуну ва яратывчулугъуну гьар тюрлю вакътиси гёрсетилди. Ватангъа, парахатлыкъгъа, ана тилге багъышлап, давгъа къаршы язгъан шиърулары охулду. Анварны сююв лирикасын бизин халкъ бек ушата, гёнгюнден уьйренелер. Спектаклде шо янына да аслу тергев берилген. «Чубар ала тастарынг…», «Аман досум…», «Эсге геле заманлар…» деген ва башгъа йырлары йырланды.
«Къайсар Къалабузаров» деген поэмасына гёре салынгъан композиция къаравчулагъа айрокъда таъсир этди. Мунда юртдагъы яшав, адатлар, ишсюймеслени сёгюв, янгы яшавгъа абат алыв суратлана. Анвар Гьажиевни ролюн Дагъыстанны ат къазангъан артисти Магьаммат Къасумов бажарывлу кюйде ойнады. Къайсар Къалабузаровну ролю буса сююмлю артистибиз, РФ-ни ат къазангъан артисти Басир Магьамматовгъа тюшген эди. Ол нечик къужурлу ойнайгъанны барыбыз да билебиз. Къаравчуланы бетинден шатлыкъ, кюлкю таймады. Анварны шиъруларына гёре язылгъан белгили йырланы РФ-ни ат къазангъан артистлери Байсолтан ва Тотуханым Осаевлер йырлады. Шаирни масхара шиъруларын ДР-ни халкъ артистлери Имамутдин Акавутдинов ва Нариман Акавов, ДР-ни ат къазангъан артистлери Жалав Бекеев ва Зугьра Межитова чебер кюйде охуду. ДР-ни ат къазангъан артисти Пахрутдин Ихивов «Эсге геле заманлар» деген йырны йырлагъанда, гючлю харс урувлар гётерилди.
Анварны шиъруларын РФ-ни ат къазангъан артисти Камил Жабукъов, ДР-ни ат къазангъан артисткасы Сабият Салимова, актёрлар Ибрагьим Атаев, Зумрут Салимгереева чебер кюйде охуду ва къаравчуланы разилигин къазанды. Спектаклни онгарывда режиссёру Байсолтан Осаев, художник Арслангерей Акавов, композитор Хизри Батыргишиев Анварны халкъ лап да кёп сюеген асарларын айырып, къужурлу сагьна гёрюнюшлени тизме болгъанын айрыча эсгерме тюше.
Бизин мухбирибиз.
Суратда: спектаклден гёрюнюш.
