Сонг оланы оьзюню кабинетинде газетни баш редактору Камил Алиев къаршылады,  газетни тарихи булан охувчуланы таныш этди. Ол газетни аты къайсы девюрден баш алагъанны гьакъында айта туруп, бугюнгю оьсювюне, даражасына ерли охувчулагъа къужурлу маълуматлар берди. К. Алиев газетни савлай дюньягъа малим этеген Интернетни бетиндеги «Кумыкский мир» деген ва газетни Yoldash.ru деген сайтыны гьакъында айтды.

Маданият бёлюкню редактору Яраш Бийдуллаев газет булан байлавлукъ тутмагъа охувчуланы барын да чакъырды.

– Сизин арагъызда яратывчулукъ булан машгъул болагъанларыгъыз болмай къалма кюй ёкъ, – деди ол. – «Яшланы дюньясы» деген сагьифаны бетлеринде шиъруларыгъыз, гиччирек хабарларыгъыз ерлешдирилежек.

Аз заманлыкъ буса да, амма агьамияты булангъы бу ёлугъув тамамлана туруп, газетни баш редактору К. Алиев охувчулагъа ва  муаллимлеге газетни, къумукъланы гьакъында бай маълуматлар тапмагъа болагъан китапланы савгъат этди.

Охувчуланы алып гелген клас ёлбашчылар Барият Михратова ва Тоту Насурова сапарны гьакъында оьзлени ойларын ачыкъ эте туруп, гележекде газет булан тыгъыс аралыкълар юрютмеге гёз алгъа тутгъанны айтды.

 

Б. ОЬЛМЕСОВА.

СУРАТДА: охувчулар булан эсделикге алынгъан сурат.

Р. Ильясова чыгъаргъан сурат.