Бу йылны январ айны башында, ТЮРКСОЙ-ну штаб-квартиринде болгъан ёлугъувда Наврузну халкъара гюнюн байрамча оьтгермекни гьакъында сёйлешинген. Шо сёйлешивлеге гёре 24-нчю мартда ЮНЕСКО-ну Париждеги штаб-квартиринде Навруз байрамны белгилемек учун тюрк миллетли 8 тюрлю пачалыкъдан ва Россияны республикалары Башкъыртстан, Татарстан, Алтай, Тува, Саха-Якъутия, Хакасия, Гагаузиядан 100-ге ювукъ артистлер гележек. Шо байрамда бу йыл Дагъыстан да биринчилей ортакъчылыкъ этежек. «Дагъыстан» деген вокал-хореография пачалыкъ ансамблибиз шонда оьзлени гьюнерин гёрсетежек.
Навруз милли байрам деп саналагъан Тюркияны 20 шагьарында буса тюрк дюньяны 20 регионундан гелген 150-ге ювукъ артистлер мартны 18-нден башлап 31-и болгъанча байрам чараларда ортакъчылыкъ этежек.
Навруз байрам янгы йыл, янгы гюн, янгы язбашны геливю, топуракъгъа исив булан бирче яшыл «хали-халча», чечеклени, атир ийислени геливю булан башлана. Бу байрам бырынгъы заманлардан бериги II асруда оьтгерилме башлагъаны гьисапгъа алынгъан.
Бизин юртларыбызда, айрокъда жагьиллер, охувчу яшлар уллу отлар да ягъып, бырынгъы адатларыбызгъа гёре ону айланасындан айланып йырлар йырлап, гьар тюрлю оюнланы ойнап, байрамны шатлыкъ булан оьтгере. Уллулар буса тюрлю-тюрлю милли ашлардан тепсилер къуруп, авул-хоншуну, дос-къардашны ашы-къашы булан къаршылай. Оьтемишден башлап Яхсайгъа етгенче, ондан да оьтюп, Къызлар бойлагъа ва Дагъыстанны шимал дазусуна ерли юртларда, шагьарларда гьаза Навруз гюню мубарак деп, бир-биревню къутлай туруп бырынгъы йырларыбыз чалына, бийивлер гёрсетиле. Биз де охувчуланы шо берекетли калималаны да айтып къутлай туруп, янгы язбашда, янгы йылда гьаригиз тутгъан умутлагъа савлукъ булан етишме Аллагь насип этсин деп айтма сюебиз.
Я. БИЙДУЛЛАЕВ.
