Январ айны 20-сы Дагъыстан Республиканы тувгъан гюню деп гьисап этиле. Шо гюн Дагъыстанны топуракъларына Терик областны да бир гесегин къошуп, Дагъыстан Автоном Совет Социалист Республикасы къурулгъан. Арадан 11 ай гетип, декабрни 1-нден 7-сине ерли аралыкъда биринчи съезд оьтгериле ва Дагъыстан Республиканы Конституциясы къабул этиле.

Дагъыстанны тарихинде биринчи болуп къалгъан уллу агьвалат, о да – Солакъ оьзенни сувун Магьачкъалагъа ерли етишдирмек учун къол гюч булан шо йыл къазылгъан татавул. Гьали де шо татавулдан сув геле. О болмагъан эди буса, Магьачкъала шагьарны да буссагьатгъы оьсювю болмас эди. Шо татавулгъа Октябр революцияны аты къоюлгъан. Гёрмекли иши учун бир йыл болагъан Дагъыстан Автоном Совет Социалист Республикасы РСФСР-ни Загьмат Къызыл Байракъ ордени булан савгъатлангъан.

Татавулну узунлугъу 50 чакъырым бар. Ону булкъа къайдада халкъ жыйылып ишлеген.

Дагъыстан Загьмат Къызыл Байракъ орденден къайры, дагъы да 1965-нчи, 1970-нчи йылларда Ленинни ва Октябр революцияны орденлери булан да савгъатлангъан.

Республиканы тарихинде сакълангъан ва сакъланажакъ бирдагъы бир агьвалат, о да – 1991-нчи йыл май айны 13-нде Дагъыстан АССР-ни депутатларыны съездинде республиканы пачалыкъ статусу ва аты алышынгъаны. Энни огъар «Дагъыстан Республика» деп айтыла.

1993-нчю йылны декабр айыны 25-нде гючге гирген Россия Федерациясыны янгы Конституциясына гёре бизин республиканы герти аты Дагъыстан Республика деп токъташдырылгъан.

 

Оьз мухбирибиз.