– Мен эсгерилген министерликге башчылыкъ этмеге башлагъанлы, арадан тюппе-тюз эки йыл тамамлана, – деп узатды ол оьзюню гиришив сёзюн. – Шо болжал бугюн магъа этилинген ишлени жамын чыгъарма имканлыкъ береми? Бере! Айтмагъа сюегеним, мен жаваплы къуллукъда белгиленген биринчи гюнден тутуп, айлана ягъыбызда ташланагъан зараллы къалды-къулдуланы, низамсыз, башалман кюйде амалгъа гелген чёплюклени алдын алывдан башладым. Шо гьаракатда, тюзюн айтмагъа тарыкъ, бизге оьзге респуб­лика ва федерал къурумлар, ерли муниципал къурулувлары булан бирликде иш гёрмеге тюше. Шолайлыкъда, умуми гьаракат да ватандашланы экология англавларын генг­лешдиривге ва камиллешдиривге бакъдырыла. Айтмагъа сюегеним, инг башлап, Магьачкъала ва Каспийск шагьарлардагъы чёплюклени низамгъа салма урундукъ. Гьали эки де шагьарда промышленный, яшавлукъ ва къурулуш къалды-къулдулар ишлетилинеген заводлар къурулду ва ишлемеге башлады. Бирдагъы заводну къурулушу бугюнлерде Красноармейск посёлокда юрюлюп тура. Эсгерилген посёлокда да бу йылны ахырына таба машинлени эсги болуп ташланагъан покрышкаларын ишлетеген завод ишге берилежек. Озокъда, шолай заводланы къурув булан биз оьзюбюз машгъул болмайбыз. Маячылагъа-инвесторлагъа тийишли ерлени-майданланы гёрсетип белгилейбиз.

Министрни баянлыгъына гёре артдагъы эки йылны ичинде бизин умуми табии байлыкъларыбызны аманлыгъын къорумакъ учун алгъасавлу кюйде чаралар гёрюлегени гьакъда хабарлады. Акъкёлню, Къаягент бойдагъы ва оьзге ерлердеги сув-гьавузларда, оьзенлерде, Каспий ягъада юрюлеген ишлени гьакъында англатывлар берди. Ол шону натижасында Дагъыстанда балыкъчылыкъны оьсдюрювге тергев гючленегени ерли ич талапланы тюгюл ва тышдагъы талапланы да кютмеге бажарылажакъ деген пик­русун ташдырды.

Гьалиги заманда Дагъыстанда уьстде эсгерилген агьамиятлы масъалаланы яшавгъа чыгъарыв министерликде Дагъыстанны Башчысыны ДР-ни Халкъ Жыйынына йиберилген Чакъырыв ка­гъызындан таба баш алып юрюлегени гьакъда да айрыча эсгерди.

Прес-конференцияны ахырында Н. Къарачаев республикабызны маълумат къуралларыны къуллукъчулары берген гьар тюрлю соравлагъа да толу кюйде анг­латывлар берди.

Къ. КЪАРАЕВ.