Россияны билим беривге къарайгъан министри Ольга Васильева муаллимлеге алапа гьакълар тёлевню системасына этилмеге болагъан алмашынывланы гьакъында баянлыкъ берип сёйлеген. «Биз гьали муаллимлени загьматына гёре гьакъ тёлевню фондуну 70 процентин бир ставкагъа, демек, жумада 18 сагьатгъа алапа беривге тиеген кюйню этмек учун къасткъылабыз», – деген ол.
Ол айтагъан кюйде, бу масъаланы аслу ери – Россияны ерли гьакимиятлары муаллимлеге алапа, къошум гьакълар ва иштагьландырыв акъчалар беривню оьлчевлерин ва къайдаларын оьзлер онгача чечелер. Бу гьалны яхшы якъгъа тюзлемек учун энни Загьмат кодексге тийишли тюзелтивлер этмеге гьазирлик гёрюлюп тура.
«Шолар токъташгъан бир къалипдеги янашывну ойлашмагъа ва къолламагъа имканлыкъ бережек. Шо да оьз гезигинде загьматгъа гьакъ тёлевню тизимин къалиплешдирмеге, токъташгъан оьлчевдеги гьакъланы даражасында язып бегетмеге шарт яратажакъ», – деп эсгере Васильева.
Ондан алда буса О.Васильева мактапда охугъанда берилеген шагьатнамалагъа къыйматланы язагъан кюйню бир-бир шартларын башгъача этмеге тюшегенин англатгъан эди. Ону оюна гёре, сурат, музыка, физкультура дарслагъа гёре аттестатлагъа санавлу къыйматланы орнуна «ярай», «ярамай» деп язса, тюз бола. Неге тюгюл, эсгерилген дарслардан 4, 5 къыйматлар алмагъа пагьмусу аз яшлар да ёкъ тюгюл чю.Шо дарслардан алынгъан 3 къыймат буса умуми балланы тёбен тюшюре.
«Российская газета».
