Сентябр айны 10-нда Дагъыстан Республиканы Башчысы Владимир Васильевни ёлбашчылыгъы булан юрюлген генгешде Дагъыстан халкъларыны бирлигини гюнюне байлавлу оьтгерилежек байрам чараланы яшавгъа чыгъарылывуну масъалаларына къаралгъан.
Дагъыстан халкъларыны бирлигини гюню гьар йыл 15-нчи сентябрде оьтгериле. Шогъар байлавлу ДР-ни Гьукуматыны биринчи заместителини борчларын заманлыкъгъа кютеген Анатолий Карибов генгешни барышында англатгъан кюйде, аслу байрам концерти Татам Муратовну атындагъы Дагъыстан пачалыкъ филармонияда болажакъ. Концертде тюрлю коллективлер, республиканы белгили артистлери оьзлени пагьмуларын гёрсетежек. Концертлер Магьачкъаланы оьзге ерлеринде де гёз алгъа тутулгъан.
Милли библиотекада «Бизин бирлигибиз бузулмас» деген китап выставка ачылажакъ. Дослукъну уьюнде «Ачыкъ эшиклени гюню» оьтгерилежек. Бирликни гюнюне багъышлангъан байрам чаралар республиканы оьр охув ожакъларында да болажакъ.
Сентябр айны ичинде республиканы билим берив идараларында байрамгъа байлавлу яшланы сурат этив конкурслары, ачыкъ дарслар, оьзге тюрлю ишлер де юрюлюп туражакъ. Муниципалитетлерде жыйынлар, ёлугъувлар, «дёгерек столлар», ярмакюлер, олай да оьзге байрам чаралар оьтгерилежек.
Магьачкъаладагъы «Акъ кёлде» республиканы уьчюнчюлей оьтгерилеген балыкъ фестиваль да шагьарлыланы ва къонакъланы тергевюн тартар деп эсибизге геле. ДР-ни табиат байлыкъларыны ва экологиясыны министри Набиюлла Къарачаев билдирген кюйде, балыкъ тутагъанлар 100-ге ювукъ адам болажакъ. Фестивальны вакътисинде «Акъ кёлню» ягъасындагъы майданчада шо гюн оьзге тюрлю шатлыкълар да къаравуллана.
