Январ айны 16-сында ДР-ни Халкъ Жыйыныны Председателини заместители Елена Ельникова Магьачкъалада Абдулгьаким Исмайыловну атындагъы орамны онгарылгъан абзарыны ачылывунда болгъан. Шо агьвалатда ДР-ни парламентини депутатлары Магьамматкъади Гьасанов, Мурат Мамаев, Асият Алиева, Биярслан Изиев, Нариман Темуркъаев, Зумурут Бучаева, ДР-ни къурулушуну ва ЖКХ министри Малик Баглиев, Магьачкъала шагьарны башчысыны борчларын заманлыкъгъа кютеген Мурат Алиев де болгъан.
29, 29 «а», 29 «б» уьйлени есилерине онгарылгъан абзарлар савгъат этилген деме ярай. Ярыкълар салынгъан территориясы спорт къураллар булан ясандырылгъан, футбол майданы, ябыкъ беседкасы, тротуар плитка салынгъан майданы бар. Митингде сёйлей туруп, парламентни вице-спикери Е.Ельникова Халкъ Жыйыныны Председатели Хизри Шихсайитовну атындан шо районда яшайгъанланы янгы йыл ва онгарылгъан абзар булан къутлагъан. «Уьлкени ва республиканы ёлбашчылары шагьарлылагъа онгайлы шартлар яратмакъны масъаласын гётерген. Проект Халкъ Жыйыныны депутаты, «Единая Россия» деген партияны вакили Нариман Темуркъаевни ёлбашчылыгъы булан онгарыла», – деген ол.
Ондан сонг ДР-ни къурулуш ва ЖКХ министри Малик Баглиев, Магьачкъала шагьарны башчысыны борчларын заманлыкъгъа кютеген Мурат Алиев янгыртылгъан сонг абзар арив болгъанны гьакъында айтгъан.
Къонакълар абзар территориягъа къарагъан ва яшайгъанлагъа савгъатлар берген.
Бизин мухбирибиз.
