Белгили болгъаны йимик, бу йыл халкъара террорчуланы намарт хыяллары булангъы уьюрлери тишине-тырнагъына ерли савутланып дегенлей, Дагъыстанны дазуларындан оьтюп Ботлих ва оьзге районларыбызны топурагъына гиргенли арадан 20 йыл заман оьтдю.
1999-нчу йыл августну ва сентябрни гюнлеринде бары да дагъыстанлылар бирлешди, бир-бирине кёмекге къол ялгъады ва террорчулагъа къаршы ябушувгъа гётерилди.
Республикабызны районларында ва шагьарларында гёнгюллю отрядлар къурулуп, сыкълашып, дав агьвалатларда туврадан-тувра ортакъчылыгъын болдурдулар. Шолай къоркъунчлу дав гьаракат юрюлеген вакътиде Къарабудагъгент районда яшайгъанлар да парахат болуп токътамадылар. Айтагъаныкъ, олар да террорчулагъа къаршы ябушма токъташгъанланы сыдраларын толумлашдырды ва Дагъыстанны халкъларыны харлысыз гележеги учун юрюлген ябушувларда оьз элини Конституциясына аминлигин ачыкъ этип гёрсетди. Къарабудагъгентде артдагъы гюнлерде оьтгерилген эсделик жыйын да шо ябушувларда жаны къыйылгъанланы эсделигине минутлукъ шыплыкъ булан башланды.
– Халкъара террорчулагъа къаршы ябушувда бизин районну уланлары ва къызлары бютюн Дагъыстанны халкълары йимик оьз къошумун этмеге токъташгъаны гьакъда мен бугюн залда жыйылгъанланы алдында разилик булан эсгермеге сюер эдим, – деп узатды оьзюню сёзюн «Къарабудагъгент район» деген муниципал къурулувуну башчысы Магьмут Амиралиев. – Шо гюнлерде оьз элини бирлиги учун жанын къурбан этгенлени эсделиги ярыкъ болсун. Къалгъанлагъа да савлукъ булан аманлыкъ ёрамагъа сюер эдим. Бизин райондан 1500-ге ювукъ адам эсгерилген дав агьвалатларда ортакъчылыкъ этди. Бугюн мен оланы арасындан 100-евюне Дагъыстанны Башчысы Владимир Васильевни къарарына гёре хас юбилей медаллар тапшурагъаныма шат да дюрмен, тюзюн айтсам, оланы барысына да савгъат этип болмайгъаныма да талчыгъаман. Буса да, гележекде де оланы къоччакълыгъы тергевсюз къалмасын учун, оьзюбюзден гьасил болагъан гьаракатны бошама къоймажакъбыз.
Жыйында ортакъчылыкъ этген районара асгер комиссары Дайитбек Омарович, районда давну ва загьматны ветеранларыны советини председатели Абдулгьамит Мамагишиев ва оьзгелери де сёйлевлеринде гьюрметли эсделик юбилейге байлавлу оьтгерилген чараланы сиптечилерине гьакъ юрегинден оьзлени янындан разилигин билдирди.
Къ. МАГЬАММАТОВ.
СУРАТДА: юбилейге багъышланып оьтгерилген жыйынны ортакъчылары.
Автор чыгъаргъан сурат.
