Алдан берли де мердешленген кююнде, бизин республикабызны юрт хозяйство маллар болдурувчулары оланы ишлетеген предприятиелери булан бирлешип, республика, уьлке ва халкъара оьлчевюнде оьтгерилеген ярмакю-выставкаларда ортакъчылыкъ этегени асил мердешге айлангъан.
Шогъар байлавлу болуп бугюнлерде Дагъыстанны юрт хозяйство ва сурсат министри Абдулмуслим Абдулмуслимов республикабызны маълумат къуралларыны къуллукъчуларына «Дагъыстан» деген маълумат агентлигини жыйынлар юрюлеген майданында баянлыкъ этди ва кёп къадардагъы соравлагъа жаваплар къайтарды.
– Бизин уьлкебизни оьлчевюнде оьтгерилеген булай пайдалы чараланы тарихи тергевню тартмай болмай, – деп башлады оьзюню сёзюн Дагъыстанны юрт хозяйство ва сурсат министри Абдулмуслим Мугьутдинович. – Биринчилей Дагъыстанны юрт хозяйство делегациясы оьтген асруда 1923-нчю йылда ВДНХ-да ортакъчылыкъ этген. Шонда биринчилей болуп «Лезгинская» деген къой малланы журасына выставканы алтын медалы да тапшурулгъан. Дагъысын айтмагъанда, бизин республикабызны юрт хозяйство тармагъыны къуллукъчулары, оьтген йыл Москвада оьтгерилген «Алтын гюз – 2017» деген ярмакю-выставкада лап да оьр савгъатны – «Гран-прини» къазанып, шону булан дагъы да гьар тюрлю 50 алтын ва гюмюш медаллагъа ес болгъан. Айтмагъа сюегеним, «Алтын гюз – 2018» деген ярмакю-выставкада да алдынлы ерлени къолдан чыгъармагъа умут этилмей.
Белгили болгъан кююнде, шону учун Дагъыстанны делегациясына ярмакю-выставканы тёрюнде 120 квадрат метр ер гёрсетилинген. Ондан башгъа да, ярмакю-выставканы 69 ва 79 номерли павильонларында бизин республикабызны оьсюмлюкчюлюк ва гьайванчылыкъ булан машгъул болагъан лап да лайыкълы вакиллери оьз малларын къоллавчуланы алдында генг кюйде малим этежек.
Ярмакю- выставка, алданокъ белгиленген кююнде, октябр айны гьар экинчи къаттыгюнюнде Россияны Юрт хозяйство къуллукъчуларыны гюнюню гьюрметине уьлкебизни тахшагьары Москвада октябр айны 10-дан 13-не ерли оьтгериле.
Бизге де олагъа, алдан берли де адатлангъан кююнде, янгы уьстюнлюклеге етишмекни ёрамакъ къала.
Шо гьакъда етишилген натижалагъа байлавлу болуп газетибизни дагъы жумагюн чыгъажакъ номеринде генг кюйде маълумат берме умут этиле.
