Россияны язывчуларыны союзуну члени, шаир Зулейха Атагишиеваны гетген жумагюн, 27-нчи сентябрде, А-П.Салаватовну атындагъы Къумукъ музыкалы-драма театрда юбилей ахшамы оьтгерилди. Шонда Магьачкъаладан, ата юрту Къарабудагъгентден, республиканы оьзге районларындан ва юртларындан къумукъ интеллигенцияны вакиллери, язывчулар, шаирлер, муаллимлер, охувчу яшлар жыйылгъан эди.
Дагъыстанны ат къазангъан артисткасы Зугьра Межитова, юбилей ахшамны ача туруп, Къарабудагъгент районну администрациясыны башчысы Агьмат Гьажиевге сёз берди. Ол оьз гезигинде Зулейханы ва ону эгиз къызардашы Узлипатны юбилейи булан къутлай туруп, шаирибизни яратывчулугъуну гьакъында айтды. Юртлулары огъар этеген абур-сыйны, ону шиъру китапларын кёп сююп охуйгъанны эсгерди. Районну башчысы Магьмут Амиралиев йиберген къутлав кагъызны охуду. Эгизлеге гьарисине Къарабудагъгент юртну художник этген суратларын савгъат этип тапшурду.
Россияны умуми ва касбу билим берив тармагъыны гьюрметли къуллукъчусу, Дагъыстанны яшёрюмлерини ат къазангъан насигьатчысы Умсалимат Бутаева Къарабудагъгент гимназияны охувчу яшлары булан сагьнагъа чыкъды. Юртлусу Зулейханы ва ону къызардашын юбилейи булан къутлады. Охувчу яшлар буса шаирни ата юртуна, Бекенез булагъына, Къашгъа тавгъа, Герей тюзге язгъан шиъруларын чебер кюйде охуп алдылар.
«Ёлдаш» газетни жаваплы секретары Абдулла Залимханов, адабият бёлюкню редактору Яраш Бийдуллаев, старший корректор Хадижат Жанболатова, редакцияны атындан юбилярны къутлап, гюл байламлар тапшурдулар. Дагъыстанны язывчуларыны пропаганда бёлюгюню ёлбашчысы Макъсут Зайналабитов да, Дагъыстан язывчуланы атындан Зулейханы къутлай туруп, яратывчулукъ ишинде огъар уьстюнлюклер ёрады.
Дагъыстанны халкъ шаири Агьмат Жачаев бу ахшам эки де къызардашгъа гьюрмет этип гелген къаравчулагъа баракалла билдирди. Мунда Зулейханы поэзиясына гьашыкълар жыйылгъанны, къарабудагъгентлилер гьар заман да къумукъ халкъны маданиятына, адабиятына байлавлу оьтгерилеген жыйынларда актив кюйде ортакъчылыкъ этегенни эсгере туруп, шаирге яратывчулукъ ёлунда янгы оьрлюклер ёрады.
Композитор Хизри Батыргишиев, шаирни къутлай туруп, ону он беш шиърусуна макъамлар язгъанны ва олар къумукъ радиода, телевидениеде йырланагъанны эсгерди. Зулейханы шиъруларын орус тилге гёчюрген таржумачы Владимир Мишерин де оьзюню сёйлевюнде шаирни ата юртгъа, ата-анагъа ва кёп тюрлю оьзге темалагъа багъышлангъан шиъруларын гёчюргенни айта туруп, ону яратывчулукъ ёлуну ахыры болмасын деп айтды.
Дагъыстанны язывчуларыны къумукъ секциясыны ёлбашчысы, Дагъыстанны халкъ шаири Шейит-Ханум Алишева ва шаир Гюлбагъдат Омарова, дагъыстанлы язывчуланы атындан шаирибизни къутлай туруп, къаламдашына янгы-янгы асарлар яратмакъ учун савлукъ да, илгьам да ёрадылар. Къаягент райондан Зухра Исаева да къаламдашын къутлады ва районлулар ону шиъруларын кёп сююп охуйгъанын эсгерди.
Юбилей ахшамны ахырында бизин белгили йыравларыбыз Гюлханым Гьажиева, Зугьра Аселдерова, Къоркъмаскъаладагъы эргишилени хору, Зулейха Атагишиеваны шиъруларына гёре йырлар йырлап, къаравчуланы разилигин алды.
Зулейха ва Узлипат шо гюн юбилей ахшамгъа жыйылгъанлагъа гьакъ юрекден разилигин ва баракалласын билдирдилер.
Я. БИЙДУЛЛАЕВ.
СУРАТДА: юбилей ахшамындан гёрюнюш.
