Дагъыстанда октябр айны 21-де бизин халкъланы маданиятыны ва тиллерини гюню оьтгерилегени дёртюнчю йыл. Республикабызны бары да районларында ва шагьарларында бу байрамгъа багъышланып концертлер, китап выставкалар, адабият ахшамлар, язывчулар булан ёлугъувлар бола.
Гьали-гьалилерде шо гюнню гьюрметине Хумторкъали районда да чаралар оьтгерилди. Районну маданият управлениесини, Къоркъмаскъала юрт маданият къаласыны ва район китапханасыны сиптечилиги булан болгъан жыйынны ача туруп, район маданият управлениесини начальниги Мадина Къанаматова бу байрамны Дагъыстанны халкълары учун нечик агьамияты барны яшавдан мисаллар гелтирип хабарлады.
Район китапхананы охувчу яшлары Дагъыстанны халкъ шаири Агьмат Жачаевни «Мен къумукъман», Аткъай Гьажаматовну «Тил билдирген тырнавуч», Вагьит Атаевни «Тюлкю ва Хораз», Расул Гьамзатовну «Ананы гьакъында» деген шиъруларын чебер кюйде охудулар.
Эргишилени «Торкъали» деген хору буса халкъ сёзлерине язылгъан йырны айтды. Къоркъмаскъала маданият къаласында оьзбашына иш гёреген чебер коллективни ортакъчылары – йыравлар Умлайла Бадрибова ва белгили йырав Мурат Саадуев йырлагъан йырлар жыйылгъанланы кепине гелди.
Район китапхана мунда къумукъ ва дагъыстан язывчуланы, шаирлени китапларыны выставкасын да онгаргъан эди.
СУРАТДА: район китапханагъа кёп гелеген яшлар къумукъ шаирлени шиъруларын чебер кюйде охуйгъан мюгьлет.
