Дагъыстанда оьтген 2018-нчи йылда «100 школа» деген проект ДР-ни Башчысы Владимир Васильевни тапшурувуна гёре республикабызны орта билим берив идараларыны гьалын яхшылащдырмакъны гьайында гьазирленген эди. Эсгерилген проектни натижасында гёрсетилген субсидияланы кёмеклиги булан умуми билим беривню сан янын яхшылашдырмагъа ва эсги, бузукъ биналаны санавун кемитмеге, оланы янгыртмагъа кёп кёмек этди.
«100 школа» деген проектде Дагъыстан Республиканы 117 билим берив ожагъы ортакъчылыкъ этди. ДР-ни билим беривге ва илмугъа къарайгъан министерлиги берген маълуматлагъа гёре, школаланы гьалын яхшылашдыргъандан къайры да, Россия Федерацияны Гьукуматыны Председатели Дмитрий Медведевни школаланы ичлеринде онгайлыкълар болдурмакъ деген тапшурувун да яшавгъа чыгъармагъа бажарылгъан.
«100 школа» деген проектге гирген янгыз Магьачкъала шагьарда 41орта охув ожакъ бар. Бу школаларда от тюшювню алдын алыв ишлер, шоланы ичинде оланы бинасыны къалкъысындагъы агъачдан этилген къурулушлар от ялын къабунмайгъан гьалгъа гелтирилген, от тюшювню билдиреген ясандырывлар булан таъмин этилген. Шолай да, школаланы ярашдырыв ишлер этилген. Бир-бир школаларда тарыкълы алатлар янгыртылгъан.
Таргъудагъы 19 номерли школада буса, ону директору Камалутдин Межитовну айтывуна гёре, школаны къалкъысыны агъач къурулушу от къабунмагъа болмайгъан гьалгъа гелтирилген, шолай да, школаны айланасы ва ичи булан видеокамералар салынгъан.
«100 школа» деген проектни натижасында школаларда охувчу яшлар ва муаллимлер учун онгайлыкълар болдурулгъаны да гьис этиле. Шо гьакъда 19-нчу школада билим алагъан охувчуну анасы Асият Абсайитова бу ишлер булан бек рази экенлигин эсгере туруп, проектни гьазирлегенлеге ва ону яшавгъа чыгъарывда ортакъчылыкъ этгенлеге баракалла билдирди. Гележекде Таргъу школагъа шагьардан сув тартып сув масъаласы да чечилежекге умутлу экенин эсгерди.
Проектге гирген школаланы арасында Магьачкъала шагьардагъы 1 номерли гимназия да бар. Гимназияны бинасы ярашдырылгъандан къайры да, от тюшювню алдын алыв ишлер этилген, видеокамералар, шолай да, янгы мебель ва техника алынгъан. Терезелерин алышдырып, янгы терезелер салынгъан.
«100 школа» деген проектни натижасында 38 номерли гимназияны къалкъысы да мекенли кюйде ярашдырылгъан. Гимназияны директору Диана Шабанованы айтывуна гёре, бинаны къалкъысына 1966-нчы йылдан берли ярашдырыв ишлер этилмеген болгъан.
