М. А. Агьматов
Февраль айны 21-нде, 68 йыллыкъ чагъында дагъыстан адабиятны гёрмекли чалышывчусу, Дагъыстанны халкъ шаири, СССР-ни ва Россияны язывчуларыны союзуну члени, Дагъыстанны язывчуларыны союзуну правлениесини председатели Магьаммат Агьматович Агьматов арабыздан гетди.
Ол Гуниб районну Гонода юртунда 1955-нчи йыл ноябрни 13-нде тувгъан. 1979-нчу йыл орта школаны битдирген сонг Москвада М.Горькийни атындагъы адабият институтгъа охума тюшген. Охуй туруп, ол адабият тармакъда оьзюню пагьмусун гёрсетген.
Белгили орус шаир А.Блок: «Шаирни ишде оьрленивю, абур ва уьстюнлюк къазаныву ёкъ, шаирни къысматы бар», – деп язгъан. Магьаммат Агьматовични къысматы шаир, критик, публицист гьисапда Дагъыстан булан тыгъыс байлангъан. Келпет ярата буса да, асарына сюжет излей буса да, ол янгыз азиз Дагъыстанындан илгьам алгъан.
Дагъыстан китап издательстводагъы иши, сонг да узакъ йыллар Дагъыстанны язывчуларыны союзуну правлениесини председатели болуп ишлегени шаирни янгыз оьзюню загьмат ёлу болуп токътамады. Шо ёл оьзюню Ватанын гьакъ юрекден сюеген герти патриотну, халкъыны алдында оьзюне тюшген намусну кютюп юрюген, сёзню устасыны ёлу болуп токътады.
Бу пагьмулу, ич дюньясы бай адамны кёп-кёп критиклер ругь ва шаирлик якъдан белгили Расул Гьамзатовну ёлун узатывчу деп гьисаплай эди. Ону патриот ругьда гьакъ юрекден язылгъан асарлары бизин булан къалажакъ.
М.Агьматов бизин республиканы ва уьлкени адабият, жамият яшавунда актив кюйде ортакъчылыкъ этди ва халкъыны арасында абур-сый къазанды. Магьаммат Агьматович Агьматовну ярыкъ эсделиги дагъыстанлыланы арасында даимге къалажакъ.
С.А. Меликов, З.А. Аскендеров, А.М. Абдулмуслимов, М-С.Б. Магьамматов, А.П. Гьасанов, Ю.А. Левицкий, Р.А. Алиев, М.Л. Мажонц, Н.М. Омаров, С.С. Агьматов, К.М. Давдиев, Н.Ш. Абдулмуталибов, Р.Д. Жафаров, А.М. Магьмутов, М.П. Телякъавов, С.Д. Мирошкин, Р.К. Къазимагьамматов, Р.Р. Гьюсейнов.
