2017-нчи йылны ахырында къумукъ тилни ахтарывчу Къазма юртда тувгъан ва школада муаллим, сонг директор булуп ишлеген Ибадулла Гьажиевни «Йырчы Къазакъны асарларыны сёзлери» деген ат булан сёзлюк китабы чыкъды. Ибадулланы бу асарын охугъан адам Къазакъны заманында къолланып тургъан, амма бугюнлеге унутулуп барагъан ва бютюнлей унутулгъан, язывда ва тилде къолланмайгъан сёзлени гёрме, оланы уьстюнде ойлашма ва пайдалы къоллама болажакъ.
Биринчилей, ахтарывчу гьисапда И. Гьажиевни бу ишде кёп къыйналгъаны ачыкъ гёрюне. Автор Къазакъны шиъруларыны уьстюнде мекенли ишлеген, унутулгъан сёзлени охувчугъа англатмакъ учун къумукъча да, орусча да мекенли англатыв бере.
Мактапда ишлейген муаллимлеге бу китап кёп кёмек этме болагъанына бир де шеклик ёкъ. Ибадулла къумукъ сёзлюклени уьстюнде, уллу чагъына да къарамайлы, гечеси-гюню булан дегенлей эринмей-талмай загьмат тёгегенине тамаша да боласан, арив де гёресен.
Ибадулла оьзю де Дагъыстан университетни филология факультетин битдирген, тил масъалаланы, ана тилин ажайып кёп сюеген адам.
Ону йимик тилибизни тындырыкълы билеген, таза къумукъча сёйлейген аз болуп да бара. Ол тилни билип де къоймай, ону халкъ да билсин деген ой булан шу масъалада бек къаст этип айлана. Тилге багъышлангъан масъалаланы ол республика оьлчевде, ерли газетлерде заманда бир гётере, пикру алышдыра ва шо къастлыкъдан оьзю де кеплене ва башгъаланы да ойлашдыра.
Озокъда, китапны кемчиликлери де ёкъ тюгюл. Айтагъаным, англатыв береген сёзлени такрарланагъан ерлерин ону онгарма кёмек этгенлер сама да гёрме герек эди.
Жамын чыгъарып айтгъанда, Ибадулла Гьажиевни бирдагъы бир китабы къумукъ тилни билмеге, муаллимлеге, охувчу яшлагъа, тилни сюеген къумукълагъа чы нечик де, гьатта миллетни сёзлюгюню уьстюнде ишлейген ахтарывчу къумукъ алимлеге де пайдалы болар деп ойлайман.
Къалсын Акъгёзов, язывчу.
