Зиярат ГЬАЖИАЛИЕВА: Юрекден язылгъан шиърулар

Юрекден язылгъан шиърулар

Зиярат ГЬАЖИАЛИЕВА Эндирейде тувгъан, юртдагъы орта школаны битдиргенде орта-хас билим ала. Яшдан берли адабиятгъа ва маданиятгъа гьашыкъ Зиярат биревге де билдирмей шиърулар яза. 1990-нчы йылларда юртда ачылгъан театрда ортакъчылыкъ эте.
Огъар касбусуна гёре ишлеме бажарылмай, ол агьлю къуруп Ростов шагьаргъа гёче ва бугюнлерде де шонда яшай. Тувуп оьсген еринден ареклерде турса да, ол тилин унутмагъан. Уьстевюне, шо йылланы ичинде ону адабиятгъа бакъгъан сюювю артса тюгюл, кемимеген. Ол – кёп санавдагъы шиъруланы автору, тек китап чыгъарма алгъасамай. Ону сёзлерине гёре йырлар да йырлана. Шу шиъру тагъымы да печатдан биринчилей чыгъа.
Зияратны шиъруларында гьис кёп, сююв кёп, авлетлерине ва къурдашларына бакъгъан сююв гьис этиле. Ону юрекден язылгъан шиърулары къайсы агьвалатны да оьзюнден оьтгерип язагъанын гертилей.
Биз къалам къурдашыбызгъа шу тутгъан ёлунда дагъы да сынав топлап, бажарывлугъун артдырып, пагьмусун охувчулагъа гёрсетип турмакъны ёрайбыз!

* * *
Гечеликни шыплыгъына тынгласанг,
Бир тамаша пашман бола юрегинг…
Айланангны аривлюгюн англасанг,
Унутдура сюйгенингден арегинг…

Булутланы арасындан яшынып,
Ай да къарай, пачасыдай кёклени…
Ярыгъында, яманлардан яшырып,
Сююв учун ёлукъдургъан кёплени…

..Оьрден къарап билемикен къыйыным,
Гёремикен гёзьяшларым агъагъан…
Ёлдашлыкъгъа гелме сююп, сыйынып,
Айтамыкен мен барман деп янагъан…

Яда къарап сюемикен айтмагъа,
Сен талчыкъма, къарангылыкъ таяр деп…
Пашманлыгъынг унутдурма, тайдырма,
Узакъ къалмай шавлалы гюн тувар деп..

..Булут ярып ярыкъ бере ай гьызлар,
Унутдуруп пашман гетген гюнюмню…
Гёз къысагъан уланлардай юлдузлар,
Юм-чум этип алма къарай гёнгюмню…

* * *
Менден алда сен башгъаны сюйгенсен,
Башгъасына сююв сёзлер айтгъансан…
Сюювюнге жавап болмай гюйгенсен,
Умут уьзмей нече-нече къайтгъансан…

Эки къолунг къучакълагъан башгъасын,
Болма ярай, яягъындан оьпгенсен…
Сени сююп ачылмагъан къашгъа сен,
Ачувланып, амал билмей гёпгенсен…

Гьали магъа ёл салмагъа къарайсан,
Ёлакълангъан юрегингни бермеге…
Бир токътамай гьалым, гюнюм сорайсан…
Ачыкъ эшик енгил чи да гирмеге…

Яман гёрме, сен башгъаны сюйгенсен…
Шону сююп яллагъансан, гюйгенсен.
Олдай мен де къаларман бир ягъада,
Гюйген юрек тарыкъ тюгюл магъа да.
* * *
Бу къувунлу эки гюнню ичинде
Авлет учун къоркъув гирди юрекге…
Къаным ташып, юрек сызлай ичимде,
Мен нетермен яшым гетсе арекге?..

Азиз яшым ёлгъа нечик саларман,
Не айтарман, не насигьат берермен…
Пашман болса, гёнгюн нечик аларман,
Яшым гетсе, гёрмесмен, я гёрермен…

Мен нетермен, нечик тыныш аларман,
Хабар гёзлеп турарманмы, ёл къарап?…
Нечик ашап, нечик яшап боларман,
Гьалын-гюнюн кимден билермен сорап?..

…Дюньялагъа парахатлыкъ ёрап да,
Минг алгъышлар этип есим Аллагьгъа,
Гёрюнмейген гьислеримни байлап да,
Къоймажакъман тарымагъа балагьгъа……
* * *
Улан тувса, уьй толар деп айтыла,
Улан тувса, тухум артып, генглеше…
Уланланы, оьзлер гиччи болса да,
Папахлары уллулагъа тенглеше…

Улан тувса, уллу столлар къурула,
Гелгенлеге эркин аш-сув болсун деп…
Уланлагъа къой да эки союла,
Абзар- уью берекетден толсун деп…

Уланланы шолай алгъа салабыз,
Аналагъа аркъа таяв болар деп…
Етишгендокъ, сайлап гелин алабыз,
Абзарыбыз яшларындан толар деп…
* * *
Мени азиз къурдашларым, гелигиз!
Барыгъызны чакъыраман къонакълай!
Сизин булан мен оьктеммен, билигиз,
Арагъызда болмагъыма дюрмен бай!

Алдыгъызгъа ал халилер яярман,
Гьар басагъан абатыгъыз алгъышлап!
Сизин гёрюп, ашамайлы тоярман,
Гьаригизге йыр язарман багъышлап!

Яда сизге эсделикге сююнюп,
Шиърулардан гюл байламлар къурарман!
Яда буса енглеримни чююрюп,
Жаныгъызгъа не герек деп турарман!

Сиз гелигиз, сагъынгъанман нече де,
Мени азиз къурдашларым, гелигиз!
Сизин учун гюндюз тюгюл, гече де
Къапуларым мендей ачыкъ, билигиз!!!
* * *
Шагьар бавда олтургъанман ойлашып,
Яш вакътиде юрек тартып гелеген…
Ярашгъан сонг экибиз де, давлашып,
Бир-биревге ёлугъагъан, гёреген…

Эсингдеми, эки терек янаша,
Бутакълары бир-бирине къошулгъан…
Гьар гелгенде бола эдик тамаша,
Эки сюйген тюгюлмю деп яшынгъан…

Эки терек: бири – улан, бири – къыз,
Экисин де оьзюбюздей гёргеник…
Эсделикге тереклени оюп биз,
Гьарисине атларыбыз бергеник…

Эсингдеми, сюемен деп билдирип,
Тереклер де шагьат деп ант этгенинг…
Вёре, мени унутма, деп, гелтирип
Уьч япыракъ берип, оьзюнг гетгенинг…

Олтураман шагьар бавда ойлашып,
Ондан берли кёп сув эниш акъгъан деп.
Тюзюн айтса, юрек тура къайнашып,
Къысмат магъа терс гёзюнден бакъгъан деп.

Сююв бизин гёзлей туруп къавшалды,
Япыракълар тёге терек тавшалды.
Къайнар гьисим гёмдюм… Тёбе топуракъ.
Сюювюме салдым 2 япыракъ.
* * *
Сюювюмню нече тюрлю тюсю бар,
Бири гетип, бири геле яныма..
Тюрлю-тюрлю тюслер къувлуй ичимде,
Энемжая гирген йимик жаныма..

Сени булан аралыгъым бузулса,
Гёкге айлана сюювюмню бояву…
Юрегим бек гьалек бола ер тапмай
Чорт сынгъандай яшавумну таяву…

Ярашгъанда ярыкъ гире жаныма,
Сюювюм де сари тюсге тюрлене…
Шавла берип шатлыкъ толгъан юрегим
Гиччи яшдай гьар сёзюнге кюрлене…

Гёрюп турсам сени таймай янымда,
Бир тамаша яшгъылт бола сюювюм…
Парахатлыкъ гирип талгъан жаныма,
Ареклерде къала юрек гюювюм…

Сагъынгъанда, сени гёрме сюйгенде,
Сююв яна къызыл отдай, талпына…
Ёлугъувну гюнюн гёзлеп юрегим,
Ёлгъа къарай чыкъма сююп алдынга…

Сени барынг байлыкъ магъа яшавда,
Сени сююп жаным бир де дёнмесин..
Не болса да, нечик тюсде янса да,
Ичимдеги энемжая сёнмесин…

Авторизация
*
*
Регистрация
*
*
*
Согласны с условиями сайта?
Генерация пароля