Уьстюнлюк алып къайтды

Бугюнлерде Совет Союзну Игити Юсуп Акаев, оьзюню уьюне къайтды ва уьст болуп геливюн къаршылав шатлыкъ огъар 23 йыл тамам болагъанлыкъны гюню булан рас гелди.

Анасы ону давну биринчи йылында душманлагъа къаршы ябушувгъа яш улан вакътисинде узатгъан. Гьали буса о шону Алтын Юлдузлу ябушувчу 7 орденли макътавлу боец кюйде къаршылады. Акаев душманлагъа къаршы урушларда оьсген ва эр санына гирген.

Къумукъ лётчик

Совет Союзну Игити Юсуп АКАЕВГЕ

Яш вакътиде сен ойнадынг тавларда,
Дагъыстанда гюл-чечекли бавларда,
Къушлар гёрдюнг тав бойларда учагъан,
Якъ-якълагъа нюр авазлар чачагъан,
Денгиздеги къайыкълардай къалкъыйгъан,
Ачыкъ, таза гьаваларда саркъыйгъан,
Сен де сюйдюнг булутлагъа сингмеге,
Къызыл юлдуздай болат къушгъа минмеге.

Кёкню уьстюн чарс булутлар япгъанда,
Намарт душман совет элге чапгъанда,
Къызыл юлдуз болат къушгъа сен миндинг,
Кёкде учуп, къанат къагъып селпиндинг,
Гече, гюндюз, сувукъ къышда, яйларда.
Душман излеп, сен айландынг айларда,
Гюню гелди, сен гючюнгню гёрсетдинг,
Намартлардан гьар ишингни уьст этдинг,
Къызбайланы нас ойларын зар этдинг,
Олар учун топуракъланы тар этдинг,
Арслан юрек бюдюремеди ябушуп,
Бек чыныкъды ара бёлмей чабушуп,
Ватан давда сен гёрсетдинг гьюнерлер,
Сукъланардай оьзюнг тенгли кёп эрлер,
Гёк гюлледен гёзлерингни бурмадынг,
Сен тартынып икъгъа гирип турмадынг.
Батыр Юсуп, Совет кёкню якъладынг,
Жан алмай, Ватанынгны сакъладынг,
Душманлагъа кёкден тюшген таш болдунг,
Къумукълардан Игит чыкъгъан яш болдунг,
Багьа берди Ватан сени ишинге,
Ал шавлалы орден такъды тёшюнге.

И. ИЛЬЯСОВ.

«Ленин ёлу», 1945-нчи йыл, 19-нчу март.