Бабаюрт районлуланы хас асгер гьаракатда гёрсетеген уьстюнлюклери халкъыбызны юреклеринде оьктемлик ва оьрлюк тувдура. Муна бирдагъы бир савгъат да оьзюню есин тапды. Адил Янгыюртлу капитан Забит Нурмагьамматов, Россия Федерацияны Президенти Владимир Путинни Указына гёре Украина булангъы хас асгер гьаракатда гёрсетген игитлиги учун Жуковну медалы булан савгъатлангъан.
Касбусу асгерчи Забит Нурмагьамматов хас асгер гьаракат башлангъан биринчи гюнлерден тутуп алдынлы асгер бёлюклени сыдраларында Херсон якъда ерлешген Россияны янгы къошулгъан республикаларын иблислерден якълап дав тапшурувланы кюте.
Забитни мен яшдан берли таныйман. Ол дав ишлеге атасындан ва атасыны агъасындан уьлгю алып муштарлы болгъан. Узакъ йыллар Бабаюрт районну комиссариатында ишлеген сонг, Россияны Савутлу Гючлерини командованиеси булан дыгъар байлап, яхшы сынав топлагъан офицер гьисапда инамлыкъ ва тюзлюк булан элин ва халкъын якъламагъа гете.
2022-нчи йыл гёрсетген къоччакълыгъы ва игитлиги учун ол Россия Федерацияны Президенти Путинни Указы булан «Къоччакълыгъы учун» деген медаль булан да савгъатлангъан эди.
Гьали-гьалилерде Забит къысгъа болжаллы отпускагъа гелген вакътиде мен ону булан гёзленмейген кюйде къаршы болуп къалдым. Ёлугъувну вакътисинде биз ону дав ёллары ва миллетчилеге къаршы бетге-бет туруп игит кюйде ябушагъан ёлдашлары гьакъда лакъыр этдик. Амма, шо вакътиде ону бирдагъы савгъаты гьакъда билмей эдим, ол оьзю де ону эсгермеди.
Сонгунда бизин ортакъ танышларыбыздан эшитдим. Забит алдына салынгъан борчланы герти кюйде кютеген, артыкъ сёзю ва къоркъунчлукъдан тартынагъан хасияты ёкъ, къоччакъ ва игит офицер.
Шолай бизин уьлгюге лайыкълы къоччакъ уланларыбыз бар чакъы, Ватаныбыз парахатлыкъда яшажагъына ва уьстюнлюк гюнден-гюн ювукъ болажагъына инанабыз.
Герейхан ГЬАЖИЕВ.
СУРАТДА: Забит НУРМАГЬАММАТОВ.
