Люксембурглу сынавлу солдат Марат Мусаев Украинада юрюлеген хас асгер чарада Оьр Командованиени буйругъун кютегенде гёрсетген къоччакълыгъы ва игитлиги саялы Россияны Президенти Владимир Путинни указына гёре, Жуковну медалы булан савгъатлангъан.

 

Марат Мусаев асгерде биринчи гюнлеринден башлап разведка ротада къуллукъ эте. Алдына салынгъан масъалаланы чечегенде ол уьч керен яралангъан. Тек, къаркъарасына нечакъы зарал гелсе де, ал ­сыдралардан таймагъан. Гетген йыл гёрсетген игитлиги учун Маратгъа «Къочакълыгъы учун» деген медаль тапшурулгъан эди.

Гьали-гьалилерде Маринка деген ерде хас операцияны кютегенде, олар душманланы атышывуну тюбюне тюшген. Оьзю яралангъангъа да къарамайлы, Марат Мусаев дав ёлдашларын машин булан санчастгъа етишдирмеге бажаргъан. Шо иши саялы ол пачалыкъ савгъатгъа лайыкълы болгъан.

Бугюнлерде де Марат Мусаев оьзюню дав ёлдашларыны янында, Бахмут бойда миллетчилер булан дав юрюте.

 

Бизин мухбирибиз.

СУРАТДА: Марат Мусаев