Сайлавлар къавгъасыз, къалмагъалсыз ва аварасыз битгенге, шонда бирдагъы гезик де Россияны Президенти болуп Владимир Путин сайлангъангъа сююнгенибиз тайып да битгенче, тюнегюн гечеги хабар барыбызны да къайгъыгъа тарытды.

Москва областны Красногорск шагьарындагъы «Крокус Сити Холл» деген ерге ял алма, концертге къарама гелген бир гюнагьсызлагъа къаршы этилинген вагьшилик, адамны гьакъылына сыйышмай. Бир-бир маълумат къуралларда жинаятчыланы миллетин излеп айланалар. Жинаятчылыкъны миллети, дини ва адамлыгъы болмай. Олар жазасыз къалмас, тек бир гьюнагьсыз ва рагьатланма гелгенлеге савутдан атышмагъа ва идараны яллатып, ичиндегилер гюйсюн, чиркисин деп этилинген жинаятчылыкъ айтып битдирмесдей адамсызлыкъ.

Террорчулукъ не экенни ва ону къайгъысын дагъыстанлылар эшитип билмей, олар нечесе адамланы къайгъыртгъан, нечесе яшланы аявлу адамларындан, ата-анасындан айыргъан. Террорчулукъ лам болду деп рагьат турма ярамай, шогъар къаршылыкъны биригип билдирме ва токътатмай юрютме герек.

Оьлгенлени адамларына къайгъырышывубузну билдире туруп, олагъа чыдамлыкъ ва сабурлукъ, зараллангъанлагъа буса тезликде сав болмакъны ёрайбыз! Ингдеси, шо террорну гьазирлегенлер де аян этилип, тезде барысы да тийишли жазасын аларгъа умут булан къалабыз.

«Ёлдаш» газетни баш редактору Гебек Къонакъбиев.