Август айны 21-нде Магьачкъаладагъы Дослукъну Уьюнде Дагъыстан Республиканы Башчысы Сергей Меликовну бизин республиканы янгыртылгъан Жамият палатасыны ва ватандашланы ихтиярларын якълав, жамият аралыкъланы оьсювюне къарайгъан Советни ортакъчылары булан ёлугъуву болду. Шо ёлугъув форум къайдада «Дагъыстан Республика: жамиятны ва гьакимиятны арасында пикру алышдырыв» деген теманы айланасында юрюлдю.
Форумну башында Сергей Меликов август айны 14-нде бизин респуб-ликаны халкъы башдан гечирген хатабалагьда жанлары къыйылгъанланы эсделигини гьюрметине бир минут шыплыкъ билдирди. Шо гюнню эсгере туруп, Меликов булай деди:
– Артдагъы вакътилерде Дагъыстангъа ва Дагъыстанны халкъына кёп къайгъыланы башындан гечирмеге тюшдю. Оланы арасында табиат гьаллар, кёп санавда ёлларда адамлар оьлеген авариялар, электрик токну ва сувну къыркъагъан гезиклер болду. 14-нчю августда буса барыбыз да кёп уллу хатабалагьны шагьаты болдукъ. Бу агьвалатлар барысы да бир тайпа ёлбашчылыны немкъорайлыгъындан ва ватандашланы гьайсызлыгъыны натижасында болагъанны барыбыз да англайбыз. Ватандашлар разисизлик билдирип ёлгъа чыгъагъанлыгъыны да себеплери ёкъ тюгюл. Тек олар шолай вакътилерде айрокъда къаравулланмагъан кюйде тувулунгъан агьвалатланы къыйынлыкъларын чечивге чатакъ салагъанын, пуршав этегенин де билмеге герек.
Ол Дагъыстан Республикадагъы масъалаланы бугюн-тангала чечмеге бажарылмайгъаны, гезик булан бары да тармакъларда ишлер юрюлюп турагъанын эсгерди. Савлукъ сакълав, билим берив тармакъларда этилген ишлени гьакъында айта туруп, халкъгъа, ватандашлагъа шо гьакъда заманында билдирмеге, маълуматланы етишдирмеге гереклигин де айтды.
Сергей Меликов Дагъыстан Республиканы Жамият палатасыны иши янгыз жамият фондлар булан тамамланып къалмагъа тюшмейгенни, республикадагъы башгъа масъалаланы арагъа салып ойлашывда ва чечивде де оьзлени къошумун этмеге герекни билдирди. Республиканы законларыны проектлерин арагъа салып ойлашывда ортакъчылыкъ этмекни тапшурду.
Дагъыстан Республиканы Жамият палатасыны председатели Азизбек Черкесов жамият къурумну гёз алгъа тутгъан ишлерини гьакъында сёйледи ва оьзге тармакъларда халкъны аслу масъалаларын чечивде бары да гючюн салып чалышажагъын билдирди.
ДР-ни Гукуматыны Председатели Абдулмуслим Абдулмуслимов жа-мият къурумланы ва оланы гьар тюрлю яшавлукъ масъалаланы чечивде гьакимият къурумлар булангъы байлавлугъуну гьакъында айтды. Ону сёзлерине гёре, бизин республикада 2950 жамият къурум гьисапгъа алынгъан. Дин къурумланы къошмагъанда, оланы арасында янгыз 20 проценти тюгюл тындырыкълы кюйде чалышмайгъанны эсгерди.
Форумда ДР-ни Халкъ Жыйыныны председатели Завур Аскендеров, ДР-ни Жамият палатасыны вакиллери ва Украина бойда юрюлеген хас асгер гьаракатны ортакъчысы Алибег Къазанбиев сёйледи.
