Оьтген ял алыв гюнлерде, уьлкени Президентин сайлавлагъа гьазирлик гёрювню оьлчевюнде, олай да алдагъы йылларда болгъан кемчиликлени алдын алмакъ муратда, Бабаюрт райондан 55 жамият тергевчю Къызлар шагьарда оьтгерилген охувларда болду.
Жамият тергевчюлени бригадири Герейхан Гьажиевни сёзлерине гёре, олар сайлавларда оьзлеге тапшурулгъан ишин билеген, тюзлюкню янын тутагъан адамлар болмагъа герек. Оланы тюз гёрсетилген маълуматларындан кёп зат гьасил бола.
«Бабаюрт районда Россия Федерацияны Президентин сайлавлар таза оьтгерилсин учун, гьар сайлав бёлюкде 55 жамият тергевчю иш гёрежек. Оьтгерилген охувлар тергевчюлер сайлавлагъа гьазирлик гёрювню оьр даражада, тюз ёлда оьтгермеге ва халкъ сайлав низамгъа инамлыкъ булан янашажагъына болушлукъ этежекге инамлыкъ тувдура», – деди ол.
Семинарны барышында лекторлар тергевчюлени ишине байлавлу, ондан къайры да теориягъа кюрчюленген, сынав якъдан да тындырыкълы англатывлар да бердилер.
Охув семинарны ахырында олар алгъан билимлерин тестирование булан беклешдирдилер ва 2024-нчю йылны март айында оьтгерилежек Россияны Президентини сайлавларында къоллама болажакълар.
Оьз мухбирибиз.
