Завур Аскендеров: «Дагъыстанны энергетикасы толу кюйде ишлесин учун таман чакъы харж гёрсетилме герек»
19-нчу сентябрде Дагъыстанны Халкъ Жыйыныны председатели Завур Аскендеров «дёгерек столну» къайдасында юрюлген жыйында Дагъыстанда электрик гючлер янгылмай ва сан янлы ишлейген кюйню масъалаларына ва гьалны чечивге къаралды.
Завур Асевович оьзюню сёйлевюнде яй айларда электрик ток адамлагъа толу кюйде берилмейгенни ва шоланы янындан айыплар болагъанны айтды.
–Натижада адамлар ёлланы ябагъан гезиклер де болду,– дей ол. –Шолай гьаракатлар адамланы арасында къувунлу гьал тувдура. Бизин сайлавчуларыбыз негьакъ айтмай, ток булан таъмин этивге тергев осал. Шо тармакъны къуллукъчулары бир къышны сувугъун, бир де яйны иссилигин багьана этелер. Бизден сувукъ да, исси де ерлерде неге болмай шолай? Къачан болгъанча узатылажакъ шулай кюй, бизге башлап инг де тарыкълы ерлени ярашдырма герек. Токну къоллайгъанлар энниден сонг кёп болса тюгюл кемимежек.
Дагъыстанны Гьукуматыны председателини 1-нчи орунбасары
Манвел Мажонц билдирген кюйде, электрик имаратлар оьзлеге гёрсетилген болжалдан 2 керенге артыкъ ишлеп тура ва гьалиги талаплагъа жавап бермей.
–Артдагъы вакътилерде эсгиленген трансформаторлагъа янгы этилинген уьйлер, иш къурумлар къошулалар, — дей М. Мажонц. – Федерал харжланы къоллап шоланы янгыртмаса, гьал дагъы да такрарланажакъ. Дагъы да айтсам, къоллавчулар электрик токну гьагъын тёлемейлер.
–Халкъ токну къоллагъаны учун гьакъ тёлемей деген хабар юрюле, гьал шолай тюгюл. Шо адамланы ток гючлер булан таъмин этегенлени етдиринки ишлемейгенинден,–деди З.Аскендеров.
Оьтген заманны ичинде республикада 400 керенден де артыкъ ток тайгъан. Шо кёп затгъа четимлик эте ва адамлагъа бек зарал гелтире. Шондан къайры да республикада токну кёп харжлайгъан 70 майнинг-фермаланы иши токътатылгъан.
Сёйлевлени жамлашдырып айтса, тарыкъ чакъы касбучулар ёкълугъу, контролёрланы немкъорайлыгъы, есисиз къалгъан электрик сетлени ва далапчылар токгъа къошулмакъ учунгъу четимликлени гьакъында да айтылды.
Завур Аскендеров «Россети Северный Кавказ» деген къурумну ёлбашчысыны орунбасары Сергей Поляковгъа ва шону Дагъыстандагъы филиалыны ёлбашчысы Магьамматхабиб Мухумаевге тез арада шу масъаланы чечмекни тапшурду. Энергетика масъаланы чечмек учун Магьачкъала шагьаргъа 720 миллион манат берилгенни гьакъында айта туруп, къышгъа тарыкъ болар материалланы топламакъны гьакъында айтылды.
Жыйынны тамамлай туруп Завур Аскендеров Россияны энергетика министерлигине чыгъып да, ерли бюджетден ва «Россети Северный Кавказ» деген къурум оьзлени харжларын къошуп да, Дагъыстанны энергетикасы толу кюйде ишлесин учун таман чакъы харж гёрсетилме герекни айтды.
Гебек Къонакъбиев.
