Базар аралыкълар оьмюр сюреген девюрде республикабызны промышленный маллар чыгъарыв булан машгъул болагъан уллу предприятиелерини арасында Къызлар шагьардагъы «Концерн КЭМЗ» деген белгили акционер жамият ал сыдраларда токътагъан.
Сыкълашгъан сынавлу коллективде гьалиги заманда айлана якъдагъы талапланы гьисапгъа алып, пачалыкъ тапшурувланы кютювге бажарывлу кюйде янашывну натижасында чыгъарылагъанмалланы жураларыны оьлчевлери ва сан яны артып тербей.
Айлана якъдагъы экономика къысасланы шартларында регионну ва савлай Россия оьлчевюндеги къоллавчулар агропромышленный, туризм, савлукъ сакълав, къурулуш, яшавлукъ-коммунал, энергетика-ягъарлыкъ комплексини тармакъларында эсгерилген заводда чыгъарылагъан малланы айрыча къыйматлай демеге ярай.
Айтмагъа сюегеним, бугюнлерде пачалыкъ тапшурувлагъа гёре асгер — промышленность комплекси учун заводда дав савутлар ва атышыв савутлагъа ясандырылагъан къураллар чыгъарылагъаны да бизин пикрубузну ачыкъдан ташдыра.
– Бизде гьали-гьалилерде башлапгъы сынав гьисапда санавлар булан ишлейген электрон-оптика къуралланы оборона тапшурувлагъа гёре чыгъармагъа башладыкъ, – дей эсгерилген акционер жамиятны башчысыны заместители Магьаммат Агьматов. – Пачалыкъ тапшурув берегенлерден бизге етишген маълуматлагъа гёре асгер талаплар учун гьазирленген дёгерчекли къурал «Тайфун-ВДВ» деген бронеавтомобиллеге ва оьзге кёкден учагъан, сувдан юзеген, ерден юрюйген техникагъа ясандырылып асгер гьаракатларда пайдаландырылажакъ.
Белгили болгъан кюйде, бугюнлерде эсгерилген заводну башгъа-башгъа производство бёлюклеринде 2 мингден кёп касбучу борчларына бажарывлу кюйде янаша. Шолайлыкъда, йылда 2 миллиарддан да къолай акъчаны оьлчевюнде гьар тюрлю маллар чыгъарыла.
Шо да гьар тюрлю оьлчевдеги бюджетге 200 миллион манатгъа налог гьакъланы йибермеге имканлыкълар ярата…
Алда авиацияны талаплары учун тышдан гелтирилеген запас частлар гьали токъталгъан. Къызлардагъы электромеханика заводда пачалыкъ тапшурувну оьлчевюнде авиация моторлар жыягъан Россиядагъы бир нече бирлешген корпорациялар учун гьар тюрлю къураллар чыгъарылагъаны гьакъда да айрыча эсгермеге тюше.
Шолайлыкъда, йылдан-йылгъа заводда чыгъарылагъан гьар тюрлю машинлени ва техника къуралланы, машинлешдирилген автоматланы журалары къолайлаша барагъаны сынавда аян этилине.
2023-нчю йылда да заводда «АП-55» деген гиччи имканлыкълары булангъы вертолётну чыгъарывгъа байлавлу сынавлары оьтгерилген эди. Бу йыл да адамланы ташыйгъан пассажир самолётланы ичине-салонуна ясандырылагъан гьаваны кюйлейген къураллар да ишде тергележек ва пайдаландырывгъа берилежек деп къаравуллана.
Къ. КЪАРАЕВ.
СУРАТЛАРДА: заводну ёлбашчысы Ибрагьим Агьматов ДР-ни Гьукуматыны Председатели Абдулмуслим Абдулмуслимовну янгы къураллар булан таныш эте.
